Nagaland nunga International Day of the World’s Indigenous Peoples amung

Deobar nü Wokha district kübok Yanpha yimtak  “alima lisopur anogomong” sentong nung shilem agir, Rengma aser Tai Ahoms nungertem noksa nung angur. August 09, 2015.

Dimapur, August 9 (TYO) : Alima den liromedema Naga Peoples’ Movement for Human Rights (NPMHR)-i International Day of the World’s Indigenous Peoples ayongzüka mungogo.
Iba anogomung ya Wokha kübok Yanpha yimtsüng nung kidangsüa aliba Assam nungi lisopurtem den külemi amung.
Sentong nung Assam kübok Karbi aser Tai-Ahom kintem den Assam nung aliba Rengma Naga nungertem, NSF, Indigenous Women Forum of North East India, Yanpha yimertem aser temeket nung alirtem adenshia shilem agi.
“Lisopurtemji pei litsü nung kiburtem lir aser lisopur aika liaka, tanü lokti nung parnok ajak khuret aser onüktem kasa ajurur. Lisopurtemi pei indang sobaliba sama aoba atema tebilemtsü khuret abener aser meketa aliba teloktemi parnok tajemzükba jenjang nung amshiba aser parnok madak tashiyim inyakba ajanga timtem ajurur” ta tanü Neingulo Krome, SC, NPMHR-i ashi.
September 13, 2007 nü UN General Assembly-i yangluba UNDRIP nung lisopurtem indang temetentemji meimchir temeten den medemdangtsüba masü saka akhidang nungi parnok nem temeten magütsüi aruba reprangshimtsü indang shia lir, ta Neingulo Krome-isa ashi.
Alima nütsüng yongsük nung lisopurtem noklang nung shilem 15 dang lir aser lisopur timbaka Asia nung lir. India nung reprangdangra north east nung lisopurtem timba lir. Asenoki asen meketa reprangdangra, lisopur aika lir aser asenoki parnok den tesentaktep yanglutsüla. Tanü iba anogo amungba ajanga tesentaktep yangluba tenzüker aser asenoki kidanger den teyariteper ka ama akhümtsübutepa alitsüla, ta Krome-isa ayongzük.
Küm noklang aika tejaklen nungi asenok tesentaktep tajung aliba atema aser ano asen sobaliba aser yimyatsüya lemsatepba den olemtep tajung alitsü atema iba benjung amungtsü sentong renema amunger, ta NPHMR-i ashi.
Asia Indigenous Peoples Pact (AIPP) Foundation ajanga sangdong ka agütsüba nung, UN Declaration on the Rights of Indigenous peoples nung shia aliba ama state temi kati ka akhümtsübuteptsü, agizüktsü aser pei temeten kümzüka ayutsüla, ta shia liasü.
Tanü agiba sentong nung Karbi, Rengma aser Tai-Ahom nungi taintem den NSF aser IWFNEI nungertemi o jembi.
Sentong nungsa sobaliba ken aser yartsüngsangtem lemsatep aser metsüjang den süngdonglidongtem lemsatep.