Nagaland nunga Islamic teloktem tsüngsü bushitsüla

Taoba hopta Assam Police-i Assam nung Islamic State of Iraq & Syria (ISIS) telok indang osang kanga bulua belenshir aser iba telok sapurtem lir ta bushitetba osang ka sangdongogo. Parnoki iba ya internet traffic nung ajemdaker bushitet aser Assam Police CID aser National Technical Research Organisation (NTRO) nati ISIS indang maparen mita reprangdar ta Assam Police DGP-i ashiba asenoki osangkakettem nung züngshiogo. Süra Nagaland nunga talisa Dimapur nung Nagaland Police-i koba tashi ka nung item mesükba teloktem anema mapa inyakdar. Dimapur ya ajak temeyoktep aliba jila ka lir aser Naga nungeri dang masü pei bendangertemi ozüng alema mapa inyaksangshiba aiben ataloker. Tanga state tem nungi telungpur teloktemia Dimapur nung arua tashiyim mapa inyakteter süra ISIS amala Islamic teloktemia Dimapur nung kongsang amenoker mapa inyakya alitsü. Reprangdanga ora Nagaland nung aser talisa Dimapur nung Muslim nunger nütsüng yongsük aika lir aser parnok rongnung Nagaland state ta tenüng mejatetdangyongi arua alirtem dena lir. India linük kübok tesem balala nungi Nagaland nung adenshia Muslim nungertem, kar shishilembatsü, kar tesayur inyaktsü aser yamaji pei pok mesütsü atema mapa tapu balala inyaker. Ajisüaka, asenok Naga nunger atema tekümdangtsü kaji ozüng alema aruba Muslim nungertem dak keta lir. Nagaland nung arua alir Muslim nungerji ajak majung ta mezüngshir, saka ozüng alema arurtem aser talisa Bangladesh nungi aruba Muslim nungertem dak tetsübutsü keta lir. Reprangdanga ora item nisungtemji tanga Muslim nunger den khenyongi balaka aser parnok mulungsentsü aser tangatetba balaka lir. IBIs mesüra Mia ta züngshiba Muslim nungertem ya temulung tulu, tetsübu kecha mali aser parnok dang ajangzüktsü süra nisung tepseta endoktsü nungnanga maliba mulungsentsü keta lir. Tesüiba mapangtem nung item nisungtemi asen Naga tsürtem dak tim mesüi teka sangshiba aser tashiyim agi raksatsüba lendongtema atalokogo. Bangladesh ya Muslim nunger timba ser aliba linük ka lir aser Islam tamangba yimsü tali bilemloka oa amanger lennirtem aika lir aser parnok tesayuba sülen anidaker nütsüng aika lir. Küm ishika tsüngda Islam yimsü talila bilemloka oa amangba tangatetba anema ola adoker nisung aika Bangladesh nung yimjak nung tepsetogo. Iba linük nungi sensotem yangi Nagaland nung arua lir aser shibai metet parnok rongnung tamangba yimsü talila bilemloka oa amangertemjia dena alitsü akok. Alima nung Muslim nunger tali bilemloka oa amangertemi tentetba kiralongrar telok tulu aika lir aser asenoki teti angashiba Taliban, Al Qaeda, Boko Haram, Hizbul Mujahideen, ISIS aser India nunga Indian Mujahideen indang kongsangtem Muslim nunger aliba tesemtem nung prokshia lir. Item teloktem indang alizüng ka lir aser ibaji parnoki Quran nung ajemdaker alima ya Islamic lima kümdaktsütsü aser parnok anemertem samatsütsü atema lir. Dimapur amala Muslim nunger aika aliba jila nung shibai metet item kiralongrar telok indang kongsangtem amenoka alitsü. Tenteta meliaka Dimapur aser Nagaland nung aliba Muslim nungertemi item telok asoshi senotsü sarutepba bener yoka yaritepya alitsü akok. Anungji tanga state tem ama Nagaland Police-ia item mesükba teloktem indang maparen mita reprangtsüla aser kokra itdangitter tem yua osang tejangja metettsü merangtsüla. Tanü asenoki zübazüba dang toktsüra asüng asen lima nung timtem mesüra lendong tulu ataloktsü ana nung dang lir. Alima nung Islamic kiralongrartemi ozüng alema mapa jenti inyaker saka parnoki tongtipang süa inyakbaji Khristan tamangertem anema mapa inyakba lir. Khristan tamangertem aliba Naga lima nung Islamic kiralongrartemi lendong bener arutsütsüji meteta mali. Anungji memenudang Nagaland Police-i item teloktem tsüngsü bushia mapa inyaktsüla.