Nagaland nunga Kohima nung July 28 nü ‘World Hepatitis Day’ ayongzüka mongogo

Kohima, Chiteni/July 30 (TYO): Chiteni/July 28, 2018 nü alima linüktem den külemi Nagaland nunga ‘Test, Treat Hepatitis’ omen nung ajemdaker World Hepatitis Day anogomong mongogo.
Hotel Japfü, Kohima nung Nagaland State AIDS Control Society (NSACS), NUN aser Kripa Foundation-i senteper ayongzükba tongti sentong nung jembidang taoba mapang Nagaland Users’ Network (NUN) Tir, Ketho Angami-i, Viral Hepatitis, talisa Hepatitis C ya temang atema tebilemtsü tuluka kümogo, ajisüaka Nagaland nung Health Department-i treatment kecha magutsüba den care support magutsüba ajanga tamakok ngua state nung shirangertem meyaritet, ta tesasaba olen ka metetdaktsü.
Paisa, “Asenoki tanen makai tasümang azünger, aser tia akar kari treatment agitetaka testing aser diagnosis facilities junga maliba ajanga timtem aika ajuruogo, iba denji külemi parnok treatment nung sen jenti indokogo,” ta ashi.
Iba dak alia doctor karibo treatment tai agutsür aser jenjang tasak meshir, koba ajanga pharmaceutical companies dang ajangzükdaktsür, ta paisa ashi.
“Shisatsü agüja-aka aser sorkaria iba tashidak khuret indang meteta liaka Health Department-i ola madoki dang angar, aser ibaji ajanga tashidak menazüker tasenpur, HBV aser HCV dak sendakba agi asürtem atema IDSP aser NHM-i khuretji abener,” ta pai ashi.
“Tanü Delhi nung tenzükba National Viral Hepatitis Prevention & Control program nung Nagaland bo madenba atema kanga sasar, kechiyong state nung yimtenren lenirtemi linük jenjang nung iba tebilemtsü atema mejembi, iba denji külemi NHM-ia parnok indang Annual Action Plan (AAP) nung ibaji mezüngsem,” ta paisa metetdaktsü.
“Sorkar mesüra senotsü agi yaritsüpur shinga makai onoki HBV aser HCV prevention den treatment atema awareness tenzük; onoki Generic pharmas den jenjang ajemtsü atema jembia nisungtem nem treatment agutsü. Onoki NCDC, NACO, NSACS aser Health department nung RTI agutsüba ajanga Central aser state sorkartem indang mapatong balala jangja. Onoki nisungtem nem treatment agutsütsü atema atar, iba mapang nungjisa nisung aika asüba angur,” ta paisa nemjema metetdaktsü.
“Lenir tajung mali aser Nagaland sorkar den Health Department-ia meinyakerji, ta ser onoki nisungtem asü matatsü,” ta pai ashi.
“State sorkari anema-alibaren atema inyaktsüla, kechiyong ibaji state teinyaktsü mapa, aser India linük Temzüng Arrla 21 nung senso ajak taküm kümzüka ayutsü atema shia lir,” ta pai nenshia metetdaktsü.
“Asenok kobi melii court nung ajuruteptsüsa akumtsü,” ta pai metetdaktsü. Iba sentong nung Health Department nung Director densema health department nungi ketdangsertem aika dena liasü.
Kasa sentong nung jembidang Health & Family Welfare Director, Dr. Tokuho Chishi-i, atangji meimchir ajak akhümketa alitsü asoshi temeden lir, ta ashi.
Mozütem alizükba dak sendakba nung Director-i, mozü rizünga ayutsü atema temperature ama telatetba kar lir, ta ashi.
Paisa, “Pharmaceutical company balala indang mozü kasa alir, ajisüaka jenjang balala. Anungji mozü yangluba nung doctor tem densema mali,” ta ashi.
Mozü ajanga doctor temi senotsü ajangzüker, ta aitsübaji tai, ta paisa shisem.
Dr. Chishi-i, mozü jenjang asakbaji drug regulating authority ka maliba ajanga lir. Ano külen pharmaceutical companies dak-a tuluka keta lir, ta ashi.
“Anungji department nem tai tongloktsüba dang nungibo melungtet teloktemi (NGOs) Ato Kilonser office dena tongteptsü merangtsüla, kechiyong tang aliba inyakyim melenshitsü atema Ato Kilonser dak tashi lir,” ta paisa metetdaktsü.
Hepatitis dak sendakba osang peria manguba dak sendakba nung pai, World Health Organisation (WHO) nema tai tongloktsütsüla, kechiyong Sustainable Development Goals nung hepatitis indang kecha shia mali, ta shisem.