Nagaland nunga National Deworming Day (NDD) among

Dimapur, February 10 (TYO) : Linük den liromedema Nagaland nunga February 10, 2016 nü National Deworming Day (NDD) sentong tenzükogo.

TM Government Higher Secondary School Kohima nung ayongzüka agiba sentong nung Principal Director cum Mission Director NHM, Health & Family Welfare Nagaland, Dr. Sukhato A. Sema-i o jembidang, sorkari küm 1 nungi 19 tsüngda aliba tanurtem temang anema alitsü atema teyari agütsütsü, ta metetdaktsü.

Health & Family Welfare, School Education, PHED amala allied department tem aser Village Council tem külemi longjemer Nagaland nung aliba tanurtem temang anepalubaren nung yariteptsü, ta Dr. Sukhato-isa ashi.

Health & Family Welfare Director (H), Dr. N. Mhabemo Kithan-i okila jembidang, National Deworming Day (NDD) ya linük nung school aser anganwadi centre ajak nung mapa inyakba anogo ka lir.

Tanurtem ajak nem mesen südaktsüba mozü agütsütsü nükjidong nung National Deworming Day ayongzüka amunger, ta paisa ashi.

Sentong nung Ministry of Health and Family Welfare Government of India, nungi Technical Officer Diksha Chaudhury-i o jembidang ashiba agi, National Deworming Day (NDD) nü India kübok union territory 6 aser state 30 nung tanurtem temang anema alitsü atema mesen mozü chidaktsütsü.

Iba sentong nung mendenji T.M. Government Higher Secondary School Kohima Principal, Avino Tase liasü aser State Programme Officer (RCH) Dr. Bendangla Longkumer-i anküp tepela o jembi.

TM Government Higher Secondary School nung azünger kaketshir 500 shi ka den Health & Family Welfare ketdangsertem iba sentong nung dena liasü.