Nagaland nunga NPF party nem sorkar kümdaktsütsüla

Mokokchung, Monupii 18 (TYO): Tang Karnataka election nung Karnataka Governor-i ‘single largest party’ BJP dang sorkar akümtsü asoshi jaokba maparenji tim asünungbo, Nagaland nunga NPF party nem sorkarji kümdaktsütsüla, kechiaser Nagaland nunga NPF-i tatar menden teimba ngua lir, ta Rogonü yangi Hotel Metsüben Mokokchung nung NPF Spokesman, Achumbemo Kikon-i osangbener senden ka nung jembidang metetdaktsü.
Karnataka nung atalokbaji India temzüng anema lir, saka Karnataka governor-i inyakbaji tim mapa ka süra, Nagaland nunga PDA sorkarji yakta anendaktsütsüla aser Nagaland governor-i NPF nem sorkarji kümdaktsütsüla, kechiaser Nagaland nung NPF-ji single majority party lir, ta paisa jangjashitsü.
Tang MP bye-election tour mapa ya temer külen Kohima-i meyipa or tekaratiba nung NPF party pur senden ka amentsü aser parnoki governorba ajurua single largest party dak sendakba keno ya jembitsü, ta pai ashi. Nagaland state election nunga parnoki governor dang NPF ji single largest party asünung, parnok nem sorkar kümdakjang ta shia temeden bushiogo aser ano maneni iba atema ya jembitsü, ta paisa shisem.
Achumbemo-isa tawa Mokokchung nung PDA rally nung Nagaland Chief Minister Neiphiu Rio-i jembiba o ka meyiptsüdang, “NPF party aser NPF MLA tsüngda telemsa kecha adoka mali, onok Opposition Leader T.R Zeliang aser NPF tir Dr. Shurhozelie Liezietsu na lenisüba kübok maparen ajak kanga junga tashi ita odaki aser nübur mandate onok den lir,” ta jangjashitsü. Nübur mangmangdakja lenir kati iba ama olulu jembia senzüba asoshi kanga sasaa bilemtsür, ta paisa shisem.
PDA sorkar ya telok pungu; NDPP, BJP, NPP, JDU aser Independent agi akümba lir, anungji, “iba sorkar ya pasasa odang laoadoktsü,” ta paisa kanga jangja ashi.
Tang agitsü aliba Lok Sabha Bye-election nung ya Naga People’s Front (NPF) candidate C. Apok Jamiri ayongayonga takok angutsü onoki imlar, kechiyong nübur teimba NPF den lir, ta paisa ashi.
PDA yabo election temer külen tentetba dang, saka JD(U) aser NPP ya NPF den alliance partner liasü, anungji nübur noklang nung shilem tenem (50%) dak teimba NPF den lir, ta Opposition Leader T.R Zeliang-i ashi. Paisa ashiba agi, election masüdang NPF aser tanga party-tem den voters 589216 liasü aser NDPP-BJP telungjem den 406954 liasü, ta paisa jangjashitsü.
NPF- BJP Alliance aser NDPP-BJP Alliance tetsüngda indang jangjashitsüdang, NPF o BJP nabo ‘friendly contest’ yimya nung alliance lia aru, saka NDPP o BJP nabo ‘seat sharing’ yimya nung alliance yangluba lir. Anungji, NDPP-i Naga nunger temeden ayoka achi saka NPF bo political party temeja ka lir, ta T.R-isa ashi. NPF-i BJP den alliance yangluba yabo sorkar tashi ita aotsü atema dang liasü aser NPF-i BJP bushia or adenba masü saka BJP-i ang NPF nung arua adenba lir, ta paisa shisem.
Chief Minister Neiphiu Rio-i Naga nunger temeden ajak ayok asünung, pa ya ‘High Command’-i dang amshir, anungji, high command-i kechi shidir pai aji dang inyaker, ta pai ashi.
‘State general election nung tamakok angur NDPP candidate parnok 13-i tangji NPF asemtsü”, ta T.R-isa shisem.