Nagaland nunga NRC mapa tenzüktsüla

Russia-i Afghanistan amakba sülen nungi taoba küm ishika tsüngda alima nung Islamic tangatetba asentenshir aika adokogo. Alima nung Islamic tangatetba nung tentetba teloktem – Taliban, al-Qaeda mesüra Islamic State nungertem ajanga Islamic tangatetba sülen anidakertem ajungmesor aser parnoki Islam tenüng tamajungba kümdaktsür aser tanga tamangba yimsütem anema rara menar. Küm 44 tejaklen Bangladesh ya azütokshi aser mangatettep ajanga linük ka ama tentet aser iba linüki tetsükdaktsü aser mepetmesü ajakji ajangteta linük ka kümtet. Ajisüaka, tesüiba küm asem-pezü ka tsüngda Bangladesh nung Islam yimsü dak tali bilemloka oa mapa inyakertem aika temai adokogo aser January 2013 nung parnoki Asif Mohiuddin ta ser kiralongrar anema jembishninür ka tepsetba sülen jihadi maparen tenzük. Iba tatalokba sülen nungi tamangba yimsü mamangertem, lokti atema bilemtsürtem aser terenlok atema inyakertem parnok 20 shi ka mezüng tepset. Ibji ser külen, jihadi tangatetba sülen anidakertemi homosexuals, Hindu, Khristan aser Buddhist nunger amaktsü tenzük. Item tatalokbatem atema jihadi tem dak tai tongloktsür, saka Bangladesh linük ya tetsür tesashi ana- tang teinyakdak Prime Minister, Sheikh Hasina aser la jakdang Prime Minister inyaker Khaleda Zia na tsüngda yimten tsütsü telemsa tulu adoka aliba ajangaa tensa mejungi akümer ama ajiteter. Tang aliba sorkari War Crimes Tribunal ajanga Bangladesh-i Pakistan nungi razüka aoba rara nung linük anema mapa inyakertem merenshiba ajanga Bangladesh nung telemsa tuluba kümogo. Bangladesh rara nung linük anema inyakba atema aija Jamaat-e-Islami nungi Abdul Quader Molla taküm piyong tepuokdak ayutsü obendang agütsüba sülen anogo 10 nü lir, February 15, 2013 nü liberal nisung ka mezüng tepset. War Crimes Tribunal ajanga ozüng alema inyakertem merenshitsü obendang agütsüba shia Bangladesh nung nisungtem tepsetba mapa tali bulua inyaktsü tenzük aser iba amaji tang tashi inyaka arudar. Bangladesh nung yimten tsütsü telemsa aser kati ka aitsütepba mapang ka nung Islamic khuret tuluba kümogo aser iba tensa ya tan mezüng atema par linük nung ajurur.  Küm  aika tejaklen nungi Bangladesh nungertem pei linük nung meliteti, par linük anasa aliba West Bengal, Tripura, Meghalaya aser Assam state tem nung arua alitsü tenzük. Parnok rongnung karbo ozüngi melaba ama kulitem bener arua ali saka aika ozüng alema arua ali aser ibaji ajanga tang India kübok item state tem nung mepetmesü adoka lir aser parnok dang IBIs ta tenünga jaloktsüogo. Asen Nagaland state nunga item IBIs ta ajartem aika arua lidar aser ano anogoshi maneni arur. Bangladesh linük ka ama makümdang nungi par sensotem tsüngda mangatettep aser mepetmesü adoka liasü aser iba tensa nungji linük balaka razüka ao aser tanga iba mangatettep ajanga linük nung rongrongteper.  IBIs onük ya Nagaland nunga adoker joko küm aika süia arur. Naga nunger aikati iba khuret angateta, azüoktsü aser noktangtsü atema mapa inyaker, saka ano aikati parnok atema aria bilemja aser pei ajangzüktsü mechi nung item nisungtem pusema kümzüka ayur. Taküm Assam nung assembly elections magidang yimten telok kari IBIs onük nung ammeter nübo ayim aser item teloktem jagi sorkar tashi angutsüsa takok tulu angu. Assam nung sorkar tasen tenteter anogo ishika tsüngda nung National Register of Citizens (NCR) maparen tekaratiba nung tembanga inyaktsü tetuyuba agütsü aser ano Bangladesh den arrtsüa aliba tesemtem atsübangtsü atema mapa akangshiogo. Atangji Assam state sorkari item mapa takok ngua inyak nungbo, IBIs aika Assam toktsütsüsa akümtsü aser par linükibo meyipa otettsü masüji anameta aliba state tem nungang prokshia jenoktsü. Iba onük ya asen Nagaland state asoshi khuret tuluka lir aser asenok mekümdangra künü anogo asenoka Tripura state amaji küma aotsü meteta mali. Nagaland kübok Dimapur dak alaka tanüngba district ajak nung ILP ozüng lir, saka ketdangsertemi aiben iba ozüngji timi mebenshir aser sen dang tera agütsüra ILP malirtem zübazüba senzüsenbongteter aser liteter. Talisa, Dimapur nung IBIs khuret ulura kümogo aser tanü asenoki iba khuret azüoktsü atema langka ka meinyakra, kobi melii timtem tulu ajurutsü. Bangladesh linük nung tang mepetmesü tulu adoka aliba mapang par senso aika par linük nung meliteti jenshitsü aser Assam-i parnok noktangtsü atema mapa tesashi inyakerji, Nagaland aser tanüngba state tem nungang arua jenoktsü.  Anungji, Nagaland nunga National Register of Citizens mapa tenzüktsüla aser sorkari anir bangdakpurtemi IBIs khuret agientsü aser noktangtsü atema mapa inyaktsü mapang tongja tongogo.