Nagaland nunga ‘single largest party’ nem sorkar kümdaktsütsüla

Dimapur, Monupii (May) 18 (TYO): Karnataka nung BJP-i sorkar akümtsü menden peria monguaka ‘single largest party’ tenüng nung sorkar akümtsü temelaba agütsü saka Nagaland nungbo NPF Party ‘single largest party’ süaka sorkar mekümdaktsü ta Office of the Leader of Opposition, Information & Publicity Wing-i sangdong ka nung metetdaktsü.
Governor, PB Acharya-i TR Zeliang aser NPF jaoktsüla aser Nagaland nung sorkar akümtsü maongka agütsütsüla, ta parnoki ashi.
NPF-i menden 26 nung takok angu aser Nagaland nung ‘single largest party’ liasü saka Karnataka nung BS Yeddyurappa-i aniba BJP nem maongka agütsüba ama NPF nembo magütsü. Shitaka agibo NPF nema tenangzükba agidaktsütsüba asü aser assembly floor test nung nübo sayutsü atema anogo 15 mapang agütsütsüba liasü, ta sangdong nungsa shia lir.
Kasa onük atema state balala nung ozüng balala mebenshitsüla anungji Nagaland Governor-i Karnataka nung atalokba ama NPF nem tekaratiba nung sorkar akümtsü atema ajoktsüla, ta Information & Publicity Wing-isa metetdaktsüogo.