Nagaland nunga ‘World Blood Donor Day’ amung

Directorate, Health & Family Welfare nung World Blood Donor Day amungdang Commissioner & Secretary, H&FW & Chairman NSBTC, M. Patton, IAS (abelen)-i azü tenlar nem tetushi agütsüba angur.  Mokokchung nung 44th Assam Rifles Hospital nung Col. BN Nayak CO 44 Mokokchung (achiji)-i azü tenla agütsüdang agiba noksa angur.

Dimapur, June 14 (TYO) : Alima den tsüngkang medema June 14, 2016 nü Nagaland nunga State Level World Blood Donor Day ayongzüka mungogo.
Iba sentong ya Directorate conference hall, Health & Family Welfare nung agi aser tongti tesemdangerji Commissioner & Secretary, H&FW & Chairman NSBTC, M. Patton, IAS liasü.
Azü tenla agütsüba ajanga nisung takümtem kümzükba atema tongti tesemdanger M. Patton-i tetenlar ajak dang pelaba metetdaktsü aser maneni nübortemi meimchir takümtem kümzüktsü atema longjemtsü ayongzük.
‘Nü taküm kümzüktsü atema nai taküm ka kümzükang’ ta M. Patton-i ashi aser punguben den tema azü tenlartemi mapa tajung inyakba kulikaket agizüktsü atema ayongzük.
Azü nüngdakbapurtem mapang shitak nung teyari angutsü atema paisa azü bendenba maparen tajungba nung inyaktsü atema ajungmeso.
Iba dak sendakba maparen inyaktsü atema lakh 6 nungi 7 tashi dang lemzüktsür aser ibaji ajanga bilemba ama mapa meinyakteter, ta tongti tesemdangerisa shisem.
World Blood Donor Day ya küm shia Karl Landsteir asoba anogo bilemteta amunger. Pa ya scientist mongin ka liasü aser ABO blood group system bushitetba atema Nobel prize angu.
World Blood Donor Day ya mezüng 2004 küm Johannesburg, South Africa nung amung.
Nagaland kübok Dimapur, Kohima, Mokokchung, Tuensang, Wokha, Zunheboto, Mon aser Phek district 8 nung blood bank lapoka lir. Item rongnung model blood bank ji Dimapur nung dang lir.
Iba sentong nung mendenji Joint Director, IEC, NSACS, Metevinuo Sakhrie liasü, MO I/C blood bank NHAK, Dr. V. Khamo-i tesentepertem pela agizük, Project Director NSACS, Dr. Meguosielie Kire-i anogo teratet metetdaktsü, Assistant Director VBD Alipoker-i presentation tatsüka agitsü, azü angurtem rongnungi Lemla-i o jembi aser Dy Drugs Controller & Governing body member NSBTC, W.H Patton-i anküp tepela o jembi.
Sentong nungsa Director NSBTC & Joint Director (BTs) NSACS, Dr. P. Tia Jamir-i olemtepba shilem ani aser tongti tesemdanger M. Patton IAS-i azü tenlar nisung 17 nem tetushi agütsü.
Mokokchung nunga 44th Assam Rifles Hospital Mokokchung nung World Blood Donors Day ayongzüka amung.
Iba sentong ya Mokokchung District administration-i Imkongliba Memorial District Hospital den yaritepa ayongzük aser tongti tesemdangerji Col. B N Nayak Commanding Officer 44 AR liasü.
Sentong nung DPO, District AIDS Prevention & Control Unit Mokokchung, Makshi-i anogo amungba teratet metetdaktsü aser 44th Assam Rifles jawan temi azü tenlaba atema DIO, NIC Mokokchung aser Mokokchung District Blood Donors Association (MDVBDA züngsem, Er. Temsuwati Ao-i pelaba metetdaktsü.
Mokokchung District Voluntary Blood Donors Association (MDVBDA), Molo Jamir-ia CO 44 AR Mokokchung dang mozüki amshidaktsüba atema pelaba metetdaktsü aser ano I/C Blood Bank District Hospital Mokokchung, Dr. Chubatula-i Camp ayongzükba atema pelaba shisem.
Iba sentong nung Commanding Officer Col. BN Nayak-i anir sepai 65-70 shi kati azü tenla.