Nagaland nunga ‘World No Tobacco Day’ mungogo

May 31, 2017 nü Capital Convention Centre, Kohima  nung H&TE Parliamentary Secretary, Deo Nukhu aser ketdangsertemi Tobacco Free village teshimtet nübotem den külemi agiba noksa ka angur.

Dimapur, May 31 (TYO): Alima den liromedema May 31, 2017 nü Nagaland nunga ‘World No Tobacco Day’ mungogo.
Kohima nung aliba Capital Convention Centre nung “Tobacco-A Threat to Development” omen nung ajemdaker agiba sentong nung tongti tesemdangerji Higher & Technical Education Parliamentary Secretary, Deo Nukhu liasü.
India nung moko teimtiba achiba state tem rongnung Nagaland jenjang tanabuba lir aser iba jagi asen state nung moko indang osang jungjunga prokshitsüla, ta Deo Nukhu-i o jembidang ashi.
“Moko mesepba dang nungi achiba tamajungba, anungji lanu putui moko machitsü ayongzüker. Alima nung küm shia nisung million 6 jungnüa moko dak sendakba tashidaktem agi shiranga asür aser Nagaland nung cancer kanga bulua adokba ya moko achiba ajanga teimba lir. Ajisüaka, asenoki iba osang jungjunga prokshiba ajanga nokdangtettsü” ta paisa ashi.
Tesüiba mapang tamangba yimsü nung ajemdaker nisungtemi moko achiba nungi azüoka alitsü merang saka tangbo nisungtemi health nung ajemdaker moko nungi pila alir. Moko machitsüba indang osang ya kidang, school, public tesemtem, office tem amala nung sangdongtsüla, ta Deo-isa metetdaktsü.
Nagaland yimtiba Kohima nung school aser college aika ‘tobacco free zone’ angudang kanga pelar aser maneni tesem ajunga ‘tobacco free zone’ kümdaktsütsü asoshi inyaktsüla, ta paisa ayongzük.
Sentong nung Tobacco smoke free Kohima Ambassador, Sievituo Solo-i o jembidang, pa tanur asüdang nungi moko achitsü tenzük saka pai moko machitsü telemtetba agi aser ibaji ajaga pai temang anema aliba ajanga küm 6 tashi alima tesem balala sema senzütet, ta ashi.
Sentong nung mendenji Additional Director, H&FW, Tali Jamir liasü, G. Rio School nungi Toshimeren Walling-i voice of children aser Little Flower School Kohima kaketshirtemi ken ka aten.
Kohima kübok tobacco free village asem- Philimi, Khonoma aser Jotsoma nungi teshimtet nübotemi osang lemsatep.
Dimapur nunga Salesian College, Dimapur nung World Anti-Tobacco Day sentong ayongzüaka agi aser iba sentong nung tongti tesemdangerji Dimapur Deputy Commissioner, Kesonyu Yhome, IAS aser tetushi süa jaokerji Chief Medical Officer, Dimapur, Dr. K. Vikato Kinimi na liasü.
India nung moko teimba achiba state tem rongnung Nagaland jenjang tanabuba nung lir aser iba dak sendakba bushidangba ka nung, Naga nunger shiai anogo nung moko alidang sen 69 endoker aser ibaji bendenra, ita nung sen crore 13 shi adoker, ta Kesonyu Yhome-i o jembidang ashi.
Asenoki rongsenkettsüng majungba, gari lenmang aser infrastructure majungba indangbo jembir saka moko nung sen aika endoker, ta paisa ashi.
Iba sentong nung mendenji Dr. Joe (PNF) liasü, Salesian College Principal, Fr. Polycarp-i tesentepertem pela agizük aser St. Paul Higher Secondary School, Dimapur o Salesian College kaketshirtemi ken ajanga shilem agi.
Mokokchung nunga Fazl Ali College, Auditorium nung “A Threat to Development” omen nung ajemdaker World No Tobacco Day amung.
Iba sentong nung FAC Principal, staff aser kaketshirtem aden aser principal-i Medical team dang pelaba metetdaktsü.
Sentong nung NTCP atema District Nodal Officer, Dr Moa Jamir-i power point presentation ka ajanga moko ajanga nisung ka temang aser loktiliba nung timtem bener arutsüba indang osang metetdaktsü.
Iba sentong nung IMDH nungi Dr Tiasenla aser Dr Aotula naprong aden.