Nagaland nunga World Rabies Day mungogo

Nagaland State Veterinary Council Tir, Dr. David Sema-i Kohima nung World Rabies Day  nung o jembiba angur.

Kohima, September 28 (Agencies): Alima den tsüngkang medema tanü Hombar nü Nagaland nunga ‘World Rabies Day’ anogomung munga iba anogo nüngtem nung awareness sentong agiba den state nung anti-rabies vaccination camp kaogo.
State yimtiba Kohima nung Nagaland State Veterinary Council Tir, Dr. David Sema-i iba sentong Veterinary Hospital nung tenzükja liasü, iba sülen Kohima tesem balala nung anti-rabies vaccination camp angati katsüogo.
Iba anogomung ya Nagaland State Veterinary Council, dept. of veterinary & animal husbandry aser Kohima Municipal Council-i acha ayanga liasü.
“Rabies nokdangtsü atema onoki tajungtiba agi merangdagi,” ta Dr. David-i ashi.
Paisa, nisung ajaki senteper iba tashitak nokdangtsüla, ta ashi.
“Rabies ya kanga lendong aketba aser tetsübutsü tashitak ka lir, asenoki iba tashitak sempatsüla aser samatsütsüla,” ta pai ashi.
2012 census ajanga state nung azü 1, 13, 021 züluoka lir, ta pai metetdaktsü.
Registrar Nagaland State Veterinary Council, Dr I P Khala-ia, “Rabies tashitak azüoktsü atema asenoki asen tajungtiba agi meranga inyaktsüla,” ta ashi.
Kohima Municipal Council (KMC) Superintendent, Zakiekhotuo Kiso-i, tang mezüngsüa KMC-i tekaratiba nung azü ajak tenüng züluoktsü atema maparen tenzüktsü, ta metetdaktsü.
Iba dak sentakba nung pai panchayats aser veterinary & animal husbandry department dang iba maparen takok angutsü atema yaritepdaktsüner, ta mepishiogo.
Tanü Pezielietsie (Tinpatti), High School area, KMC office, Agri-Forest, Chandmari, Lerie aser Indoor Stadium nung anti-rabies vaccination camp kaogo.