Nagaland nunga World Tuberculosis Day amung; shiranger 40,000 anepaluogo

Kohima, March 24 (TYO): Alima den külemi Nagaland nunga Brihostibarnü World Tuberculosis (TB) Day mungogo.
Iba anogomung ya ‘Unite to end TB’ omen nung ajemdaker Revised National TB Control Programme (RNTCP), Health & Family Welfare Department, Nagaland-i Kohima Press Club nung sentong ka ayongzüka agi.
Sentong nung State TB Officer, Dr. K. T. Lotha-i o jembidang, India nung TB tashidak kanga bulua adokba state 10 rongnung Nagaland dena lir, ta ashi.
HIV agi shirangertem dak TB ya melamela adoker aser parnok noklang nung shilem 60 dak TB atongtsü ana nung lir, ta Dr. K. T. Lotha-i metetdaktsü.
December 2002 nungi tenzükba sülen teyari agütsüba telemsa balala nung TB agi shiranger nisung 40,000 den tema anepaluogo, ta paisa shisem.
Tesüiba küm 4 tashi Nagaland nung tenük yoka arur. October 2003 nungi Directly Observed Treatment (DOTs) tenzükba sülen Nagaland nung TB agi shiranger ta temulung melemi bilemer nisung 1,54,968 tashi tendangogo aser TB aketer 40,562 tashi anepaludar, ta Dr. K. T. Lotha-isa metetdaktsü.
Programmatic Management of Drug-resistant TB (PMDT) kübok 2012 nungi 2015 tsüngda nisung 417 dak TB putet aser shiranger anabo Extensively drug-resistant (XDR TB) agi tonga lir, ta paisa shisem.
Revised National Tuberculosis Control Programme (RNTCP) nung District TB Centre (DTC) – 11, Designated Microscopy Centre (DMC) – 44, Microscopy Centre (MC) – 4, Drug Resistant TB Centre – 2 (Kohima & Mokokchung), Cartridge Based Nucleic Acid Amplification test (CBNAAT) lab – 4 amentetogo aser ano Zunheboto o Mon district tem atema centre ana yanglutsü mulunga agizükogo, ta ta Dr. K. T. Lotha-isa tanü metetdaktsü.
Tanü sentong nung Assistant Programme Officer RNTCP, Dr Apichetla Amer-ia o jembidang, alima nung menatepba tashidak tamajungbaji TB lir aser kümshia AIDS mesüra Malaria agi shiranger dang nungibo TB agi shirangertem teimba asür, ta ashi.
Ajisüaka, TB ya noktangeter, aser aneptsü akoker, ta Dr Apichetla Amer-isa shisem.
Tanü sentong nung Nagaland Users Network Convenor, Ketho Angami-i tesentepertem ayongzüka jembi.
World Tuberculosis (TB) Day nüngtem nung Kohima nung TB awareness atema cycle rally ka ayongzüka agi aser iba sentong nung Naga Blog Cycling Club nungi cyclist temi shilem agia liasü.