Nagaland nunga World Veterinary Day amung

Kohima, April 30 (TYO): World Veterinary Day nüngtem nung Nagaland State Veterinary Council (NSVC)-i tanü mapa tajungba inyaktsü aser rabies azüokba mapa inyaktsü bangjemtepogo.
Tanü Nagaland-i alima den liromedema World Veterinary Day amung aser iba sentong ya NSVC-i Hotel Japfü, Kohima nung ayongzüka agi.
Tanü sentong nung Commissioner & Secretary to the State Government for Veterinary & Animal Husbandry Department, M K Mero-i o jembidang, Nagaland nung veterinary doctor temi maneni angazüktsü aser shiruru, meimchir aser lipoküm jenjang ajungketba mapa nung shilem agitsü ayongzük.
“Meimchir dak atongba tashidaktem noklang nung shilem 60 ji shirurutem dak nungi adoker aser ano tanü-asüng tasen adokba tashidaktem shilem 75 tashi shirurutem nungi adokba bushitetogo. Item tashidakji Anthropoid borne disease- Ebola aser Yellow Fever, Rodent-borne diseases – Avian Flu nungertem lir,” ta M K Mero-isa ashi.
Tanü sentong nung VAS Veterinary Hospital, Dimapur district nungi Dr Michael Imti Imchen nem ‘Best Veterinarian’ sempet agütsü.
Nagaland kübok tesem balala nungi veterinarian parnok 80 jungnüa iba sentong nung aden aser parnok technical session ana agi.
Sentong nung mendenji NSVC Registrar, Dr. I P Khala liasü, NSVC President, Dr. K. David Sema-i tesentepertem pela agizük aser Dy. Registrar Dr. L. Temsu Ao-i benjung indang osang lemsatep.