Nagaland nungi Armed Forces Special Powers Act (AFSPA) ozüng agientsü akanger

Nagaland nungi  Armed Forces Special Powers Act (AFSPA) ozüng agientsü akanger

Abelen noksa nung August 11, 2016 nü Kohima Local Ground nung NSF-i ayongzüka Nagaland nungi AFSPA aser DAA  agientsü takhangba agüja longkak aitba sentong nung kaketshirtemi shilem agiba noksa nung angur.

Kohima, August 11 (TYO): Nagaland nung Armed Forces Special Powers Act (AFSPA) agüja aliba ya agientsü asoshi takangba agüja tanü Brehostibar nü Naga Students’ Federation teloki Naga nunger alidak tesem balala nung lokti senden ayongzüka liogo.
Iba senden nung Kohima nung aliba sentong nung Naga Hoho, Naga Mothers’ Association aser NPMHR teloktemia shilem agia liasü.
Iba sentong nung shilem agirtemi AFSPA ya Naga nunger tepsettsü asoshi latetba ozüng ka lir, anungji agientsüla ta metetdaktsü.
Iba lokti senden temer külen NSF teloki Prime Minister Narendra Modi dangi züluba shidi ka Nagaland Angh, PB Acharya nem agütsü.
Iba shidi nung NSF teloki ato kilonser Narendra Modi dang AFSPA ozüng ya nisung ka taküm kümzüka alitsü asoshi linük temzüng nung agüja aliba temeten anema lir, anungji agientsüla ta metetdaktsü.
Parnokisa tawa July 16, 2015 anogo nung 46 Assam Rifles telok ka major Surinder Singh-i anir Phek district kübok Wuzu yimtak injang mashimashi yokba lendong nung tetsür chanu ka aser tebur chanu ka khasetba aser tanur tetsü ka yirutsüba mapatem aija metetdaktsü. Item ajakji iba ozüng nung ajemdaker inyakba lir. Iba maparen nung state government-i bushisüngdangtsü asoshi luden ka shima lir saka ano iba osangji magütsüi lir.
Iba ama mapang ka nung ano Assam Rifles-i Pochury Students’ Union tir anema ken o agütsübaji talila mezüngmeshiba mapa ka asütsü ta metetdaktsü.
Iba ama ozüng tamajung agi Naga nunger kibong shia nung timtem ajurua lir aser iba ama meimchir taküm kecha kuli melii temulung melemtetba kisüng agi samatsütsüsa ozüng lateta aliba ya alima nung kecha temzüng ozüng agia memelar, ta Naga nunger lokti lenirtemisa aitsü.
Parnokisa Naga lima nung India sepaitem ajak meyipa bener oadoktsüla ta takangba agütsü.
Iba lokti senden nung jembirtemji Naga Hoho tongti zülur, Mutsikhoyo Yhobu, NMA tir Abieu Meru, NPMHR tongti zülur Neingulo Krome aser NSF tir Subenthang Kithan nungertem liasü.

Dimapur nunga kasa takhangba agüja kaketshirtemi shilem agiba noksa angur.
Dimapur nunga kasa takhangba agüja kaketshirtemi shilem agiba noksa angur.

Dimapur nunga kasa onük nung Dimapur Naga Students’ Union (DNSU)-i Clock tower alidak lenjem nung aser Diphupar Naga Students’ Union-i Agri Expo nung lokti senden ayongzüka liasü. Iba senden nung lokti tentet balala nungi lenirtem den kaketreju balala nungi kaketshirtem aika arua dena liasü.

You must be logged in to post a comment Login