Nagaland nungi kija aser telok, tetsür kentenertem kar

April 09, 2016 : Abiogenesis: Iba telok ya ‘Folk rock fusion’ kentener telok ka lir aser parnoki tangar dang nungi tsürang kongki tapu balaka ana amshir—Bamhum aser Tikzit. Anaprong ya Abiogenesis telok nung guitarist Moa-i au agi yanglutetba lir.
Nagaland aser Northeast tesem nung par telok ya tetsüri ken atenba telok rongnung tamapur lir aser parnok ajanga tetsür kentener telok mesüra tetsür kentenertem ajungmeso. 2007 küm Saregama-i sayatsüba, parnok indang ‘Aeon Spell’ kensep, 50buba Grammy Awards nung ‘Best Contemporary World Music album of the Year’ atema benoka liasü. Par telok nung kentener aser Bamhum apurji Arenla, Moabai guitars/harmonica/Bamhum/Tikzik amshir, Asobai drums/percussions/Tikzik amshir aser Korabai bass guitar atemer.
Mengu Suokrie: La ya kija kentener ka lir aser la Nagaland aser Northeast music tsütsü kanga tongtibang nisung ka lir.
Lai la kententsü sempet sayuba dang masü saka la dak tangar atema aria bilemba shisatsü tajung keta lir aser tensa tamajung nung süaka langka nungbo tepelatsü lir ta lai liteta sayur.
La indang mezüngbuba kensep ‘Love is all we need’ February 25, 2012 nü saya aser iba kensepji ken meimertemi kanga sapua angateper.
Tang la ken menüngokba tesem nung kanga mazüng lir, aser tsüngküm matongdangsa kensep tasen ka sayatsü imlar.
Vivace: Iba tetsür kentener telok ya November 25, 2013 nü tentet. Parnoki  pop rock aser soft rock kentem atener ajisüaka parnoki parnok ya pop indie ken atener telok amai agir.
Par telok yagi, Nagaland, Northeast, aser linük nung tetsürtem ajungmesoner. Tetsüria sabang nung tua tsürang kongki tapu balala tema ken tenteter ta parnoki alima nem metetdaktsüner. Parnok indang ‘Dream out Loud’ kensep 2013 küm saya. Iba telok nung tang Livika Swu (Vocals), Onen Nenty (bass), Nekshinaro Imchen (Guitars), Vekutalu Swuro (Keyboard) aser Rebecca (Drums) nunger lir.
Blue Kettle: Iba kentener telok ya Shillong nungi lir. Parnok ya Folk rock ken atener telok ka lir aser par telok nung Temjensula Jamir-i ken atener, Wapang Wapz Lkr-i Guitar tema ken atener, Jemti Lkr-i Guitar tema backing vocals ka ama ken atener
Satempokla Jamir-i Piano atemer aser Mali Mali Jamir-i drum tema backing vocals ka ama ken atener. Blue Kettle ya kanga dang sempet tulu aketba kentener telok ka lir aser parnoka memonoi kensep adoktsü imlar.
Divas unleashed: Iba telok ya tetsür kentener parnok pezü, Amber, Aleah, Alexis aser Alana nungeri akümba lir. Parnoki Pop ken nungi tenzüka Soul aser RnB kentem atener. 2013 küm Miss Dimapur toktepba mapang parnoki sabang nung mezüngsüa shilem agi aser iba sülen parnoki state tesem ajaklen kentena jajar. Küm ana tejaklen parnoki International Loin-loom fest nunga ken ajanga shilem agiogo. Parnoki ken aser tsürang kongki tapu balala tendangner aser kanga jangrabangraba telok ka lir.
Purple fusion: Iba telok yagi Folk Fusion ken atener. Telok nung Lamtsala H Sangtam-i ken atener, Imsanger Lkr-i guitar atemer, Mhathung Odyuo-i bass guitar atemer aser Temsu Kichu-i drums atemer. Parnoki blues, jazz, funk aser reggae ken meyoktepa atenba ajanga asenoki teti angashiba music dang nungi balaka adoker aser iba jaki parnok ken kanga tanganütsü ketdaktsür. Par telok ya northeast nung takok angur kentener telok rongnung züngoka amshir. 2014 küm amungba Akademia awards sentong nung parnoki best Folk Fusion Album of the year sempet angu.
Parnokisa ‘Songs of the Blue Hills’ documentary film nung ken ka tenja lir aser iba film ya Switzerland, Sweden, Poland aser Italy linüktem dena linük aika nung sayutsü sentong lir.