Nagaland nungi matamabensar artist temi ‘Divya Kala Shakti’ nung shilem agiogo

Dimapur, Metsüremi/March 04, 2021 (TYO): Matamabensar/tangar memenep alir lanurtemi parnok dak aketba sempet tajung nübur dang sayutettsü asoshi sabang ka agüja aser parnok sempet ajungkettsütsü nükjidong nung, Brehostibar nikongdang 5:00 ako meta Dorjee Khandu Convention Center nung ‘Divya Kala Shakti’ ta nüngja agütsür mezüng regional sobaliba sentong ka ayonga agiogo.
Iba sobaliba sentong ajanga arts, music, sobaliba tsüngsang, yoga aser martial arts sabang nung matamabensartem indang sempet sayudaktsütsü aser parnok sempet temaba jenjang kati ajungkettsütsü nükjidong lir.
North East state ajunga nungi tangar memenep lanur 55 agi iba sentong nung shilem agiogo. Arunachal Pradesh nungi nisung 11 aser Delhi, Odisha den West Bangal nungi jaokba nübutemi sentong nung denogo.
DEPWD, ministry of Social Justice and Empowerment, GoI tawabangba kübok, Social Justice and Empowerment and Tribal Affairs (SJETA), WCD and Health den Swami Vivekanand National Institute of Rehabilitation Training and Research, Cuttack, Odisha indang department tem longjemer iba sentong ayongzük.
Nagaland tenüng nungi Indigenous Music and Folk Art School of Indigenous Cultural Society Dimapur nungi matamabensar artist temi iba sentong nung shilem agiogo. Nagaland nungi shilem agir artist rongnung tenarong tajak aser o mejembiteter nisung pezü aser ‘intellect’ ka dena liasü aser Children Folkdance tesayur Kili H. Chishi aser Atuna H. Chishi (coach aser assistant coach ama) nati aser escorts-i anir parnoki iba sentong nung shilem agiogo.
Nagaland team-i Sümi Naga sobaliba tsüngsang sayu aser ‘traditional cotton spinning’ den akhi tetsü tebou ken tema aser indigenous music tem sayua liasü.
Iba sentong nung Brig ,(Dr.), B D.Mishra (Retd.) tongti tesemdanger ama jaok. Kasa mapang, Minister, Social Justice & Empowerment GoI, Shri.Dr. Thaawarchand Gehlot, Hon’ble Chief Minister AP., Shri.Pema Khandu, Hon’ble Minister Social Justice and Empowerment and Tribal Affairs, WCD & Health Shri.Alo Libang aser Secretary DEPwD, GoI., Ms. Shakuntala D. Gamlin nunger tetushi tesemdanger ama sentong nung denogo, ta sangdong ka ajanga metetdaktsü.