Nagaland nungi mezüngbuba RS MP M. Vero asü

Dimapur, January 24 (TYO): Nagaland nungi mezüngbuba Rajya Sabha MP Mülhüpra Vero (M. Vero) Hokolbarnep akümli toktsür pilaogo.
Pa arishi küm 88 liasü aser kinungtsü den tanur ana toktsür tanep 7:00 ako meta, Dimapur nung par kidang asü.
Pa den asüpila sentongji January 25 anepdang 9:00 ako nung Agri Expo, 4th mile nungi agitsü aser iba sülen Phek district kübok Runguzu yimtsüngi bener oa aremtsü.
Asür M. Vero ya Padmashree Award angur ka liasü aser pa 1956 küm Govt High School, Kohima nung matric takok angu. Iba sülen 1959 küm St Edmund’s College Shillong nung Intermediate azüng.
Pa ya Nagaland nungi Rajya Sabha MP mezüngbuba liasü aser 1964-1974 tashi kümsük anaben tashi inyak.
1974 küm pa 19-Phek Assembly Constituency nungi Nagaland Legislative Assembly (NLA) züngsem aküm. Iba sülen 1989 nung pa tanaben 18 Chozuba Assembly Constituency nungi takok ngua cabinet minister aküm.
1995 küm pa Naga Hoho indang Liaison Committee nung Chairman inyaktsü shim aser 1998-2004 tashi mezüngbuba Naga Hoho Tir inyaka liasü.
Paisa Indo-Naga Peace Mission, Chakhesang Tribal Council, Parliamentary Committee for Scheduled Castes and Scheduled Tribes aser Chakhesang Public Organization nung mapa balala inyakogo.
2006 küm India Tiri pa nem Padmashree Award agütsü.
National Political Groups lennirtem dang tatok agütsütepa putepshitsü temepishiba agütsütsü atema 1995 nungi 2004 tashi pai linük aser tangalen tesem aika sema senzü. 1999 küm pa den külemi nisungtemi tetsüng agi Patkai hills ajanga Myanmar-i ao aser Kolang yimtsüng nung asür S.S. Khaplang aser Killonser tem den-a ajurutepa liasü.
Nagaland aser Meghalaya Governor RN Ravi-ia Padma Shri Melhupra Vero asüba osang angashia aoksaba osang metetdaktsüogo.
Naga nunger rongnung mezüngbuba Rajya Sabha MP asür Melhupra Vero ya 2006 küm linük nem tematiba sempet- Padma Shri angur ka liasü. Pai MP, Nagaland sorkar nung Minister, Naga Hoho Tir ama mapa aika inyakogo, ta R.N Ravi-i sangdong ka nung metetdaktsü.
“Nagaland-i bendanga agütsüba aser nendaka inyakba public lennir ka aoksaogo. Asür kibong den asükhu lemsateper aser Tsüngremi nenok nem tashi aser tesünep agütsütsü sarasademtsür” ta Governor-isa sangdong nung ashi.