Nagaland nungi MLA 4-i NPF President dang mepishir

Dimapur, February 11 (TYO) : Urban Local Bodies (ULB) elections sülen Nagaland nung lokti tentettem aser kin teloktemi DAN sorkar nung lenisüba anema nokdakba ajanga tensa kanga mejungi kümogo aser nübortemi lungkak aitba ajanga tesüiba anogo 9 tashi sorkar ketdangsübaren meinyakteti arur, ta 15 Southern Angami II A/C nungi MLA, Er. Kropol Vitsu, 43 Tapi A/C nungi MLA, Noke Wangnao, MLA, 51 NoksenA/C nungi MLA, CM Chang aser 6 Tening AC nungi MLA, Namri Nchang nungeri NPF President dangi züluba shidi ka nung shia lir.
Tensa mejungi akümba ajanga nisung asem tashi taküm samaogo aser ano aika yirutsüogo. Nübortemi police merenshitsü atema takhangba agütsür aser army jaoka flag march agidaktsüba aitsür. Iba ama Nagaland nung tensa mejungi alidang, onoki NPF party dang, MP aser taoba Chief Minister, Neiphiu Rio aser taoba Minister & MLA, Imkong Imchen na party nungi anenja aliba tetuyuba meyipa agitsü mepishir. Ibaji ajanga kanga dang tongtipang mapang ka nung party longjemtsü aser putepshitsü, ta MLA pezüisa shidi nung metetdaktsü.
Neiphiu Rio-i Naga nunger atema bilemtsüba aser yimjung maparen akangshitsü atema Delhi nung Member of Parliament (MP) inyaktsü atema aoba atema onok pelar. Ajisüaka, tang Nagaland tensa kanga mejungi kümogo, anungji onoki pa state-i meyipa arutsü aser party longjemshitsü ayongzüker. Ibaji ajanga tensa tajungba akümtsü aser Delhi nung NDA sorkar dena tesentaktep tajungba akümtsü, ta par pezüisa NPF President dang ashi.
“Temalen shia aliba onüktemji onok kija bilemba masü saka onoki tatartem, lokti balala nung lennirtem aser ano nisung balala den sensaksemba sülen item onük lemsateper. Tang Nagaland nung nüngdakbaji Sorkari nübortem ola angatsüla aser tekaratiba nung yimjung bener arutsü aser sorkar ketdangsübaren tenzüka ottettsü atema telangzüba tajung agütsütsüla,” ta Er. Kropol Vitsu, Noke Wangnao, CM Chang aser Namri Nchang nungertemisa shidi nung shia lir.