Nagaland nungi MMA asayar asemi GAMMA Championship 2021 nung medal angu

Dimapur, Luroi/August 29 (TYO): Nagaland nungi mixed martial arts (MMA) asayar asemi Honibarnü Global Martial Arts Association (GAMMA) Asian MMA Championship 2021 nung medal nguogo.

Kekhrieneitso Angami (70.3 kg) aser Longtsukumba Ao (771 kg) nati lightweight aser welterweight division nung silver medal angu aser Arsenba Ozukum-i (56.7 kg) flyweight category nung bronze medal ngua liasü.

Final asaya nung Kazhalchstan nunger asayar Nurtaza lumakhanova den asayaba mapang Kekhrieneitso-i asaya tembanga masayateti anen aser Longtsukumba Ao, Palestine nunger sayar Yazan Jaber-i tsükdaktsü. Kasa mapang nung Hokolbarnü semifinal asayaba mapang India nunger asayarsa Dinesh Naorem-i Arsenba tsükdakja liasü.

GAMMA Asian MMA Championship nung India team-i medal 22 akokba sülen parnok tasembuba jenjang nung tembangogo. India team-i gold pezü, silver tenet aser bronze medal 11 kokteta liasü. Iba asayamung nung Kazakhstan-i medal 36 ngua temaba jenjang nung tembang aser Kyrgyzstan-i medal 22 angu. Maneni Palestine-ia medal asem aser Pakistan-i medal asem ngua liasü.