Nagaland nungi Nepal nung oa tsüngsang

Kathmandu, September 18 (Agencies): September 15 nü Nepal Academy nung Naga nunger tsüngsanger 23 tashi sobaliba sobutsü sobur asem atemba den tsüngkang metema kanga akümketa tsüngsanga liasü.
Rongnü aser jung amer parnok tetsüng kangasa metema jokshishia Naga nunger benjungmung tsüngsang kar tsüngsangogo. Iba tsüngsangtem ajanga Naga nunger sobaliba nung akaba jangjadaktsüogo aser iba sentong nung Nagaland nungi Ao kintem kijai shilem agia liasü.
Iba sentong ya ‘Indian Cultural Centre’-i ayongba liasü aser Aori shilem agiba ajanga Naga nunger sobaliba tali jangjashiogo. Sentong nung Naga nungeri yar-tsüngsang aser sobaliba ken kar tena liasü. Parnoki rara tsüngsang ka den benjungmung tsüngsang ana agi shilem agia liasü.
“Nepal nunger dang ozü kin indang yar-tsüngsang sayuba atema ni kanga pelar. Tan ya ni asoshi Nepal nung mezüngbuba aser iba ama sentong tulu nung shilem agibaa mezüngbuba lir,” ta shilem agir rongnung ka, Imdangchiba Aier-i ashi.
“Parnoki kangasa junga shilem agiogo,” ta parnok lennir Subotemjen-i shia liasü. Iba telok ya kümer küm 20 shi ajunger aser tsüngsangertem mapang shia melener.
Pai, “Onok telok ya state alema oa shilem agibabo tan ya mezüng lir aser tesem kenyongi balaka nung shilem agibaji jangratemtsüka, kechiba süra tereprangertem asoshi onok tsüngsangji kodanga mongudangba ka aser aji dang masü saka onoki atenba sobaliba kentemji parnok asoshi tasen,” ta shisem.
Sentong nungsa Nagaland nungi Nepal nung oa alirtemia ken aika meyoktepa ken ka akümba ka tena shilem agia liasü. Parnoki Hiyo Hiyo ta Naga nungeri meyuba olasü nung osang tajung ken kaket nungi ken kar enoka yanglur aten.
Iba ken atenba nung shilem agir parnok 11 rongnungi ka, arishi küm 38 tain, Chuba Ao-i, “Iba ken ajanga tanü asüng Naga nunger noksa sayur. Iba yagi onok alemli aser tang tensa libaliro ajak khen nung sayur,” ta ashi.
Paisa, “Iba sentong nung adenba ya Nagaland nung sentong kar nung adener amai lir. Akok asübo sentong nung Nepal nungera parnok sobaliba shilem kar agidaktsü asübo Nagaland nungi arurtemi kidang oa item otsüji jembila,” ta shisem.