Nagaland nungi Nizamuddin sentong nung oa adenertem dang mepishir

Dimapur, April 5 (TYO): Nizamuddin, New Delhi nung tamangba yimsü sentong ka nung Nagaland nungi oa adener ajak bushiteper, ta Deobarnü Principal Secretary Home, Abhijit Sinha IAS-i metetdaktsüogo.
Iba sentong nung oa adener kar Nagaland nungi lira State Level Control Room on COVID-19 nem osang sangoktsütsü mepishir. Pei pei district nung medical ketdangsertemi nenok dak COVID-19 tendangtsü atema 0370-2291120, 2291122 number tem ajanga osang agütsütsü metetdaktsür, ta Abhijit Sinha-isa ashi.
Hokolbar aonung tesü Dimapur nung kanga dang tesasatsü lendong ka atalokogo aser iba nung police densema lir. Iba tatalokba ya sorkari kanga süoki ia bilemer aser aibelenertem putettsü atema bushisüngdang südar. Talisa, tarutsü nung iba ama mataloktsü atema metokmeperiba aser metongjemi inyakbatem reprangshimogo, ta paisa ashi.
“Medical wadang nung inyaker ajaki police aser tangartem den COVID-19 anema lendongbang nung mapa inyaker. Anungji, kasa tangatetba nung bendanga agütsür ajak külemi longjemer inyaktsü mepishir” ta Abhijit-isa ayongzükogo.
April 5, 2020 nikongtsütsü 5:00 ako tashi nung Nagaland nungi COVID-19 tendangtsü atema sample 47 bener yokba nungi 45 ‘negative’ ta putetogo aser sample ana indang osang ano mangu lir, ta paisa metetdaktsüogo.
Department of Health and Family Welfare-i COVID-19 Hospitals pezü shimteta lir aser itemji- Chedema Ayush Hospital, District Hospital Dimapur, TB Hospital Mokokchung aser District Hospital Tuensang lir.
COVID-19 Hospital pezü nung yipden ajak agi 210 lir aser ano mozü ki pungu COVID-19 hospital akümtsü atema mapa inyakdar, ta Abhijit-isa shisem.
Tang Nagaland nung quarantine facilities 43 lir aser item nung yipden 1264 renema lir, ta paisa metetdaktsü.
Nagaland kübok tesem ajungalen tongtipang nüngdakbatem aser chiyungtsü agi meperiba mesüra anüngba osang kecha mali, ta Abhijit-isa ashi.
Abhijit Sinha-isa Deobarnü tanga sangdong ka nung Aapda Mitra Scheme kübok training agiba volunteer temi COVID-19 anema inyakba mapa nung yariteptsü metetdaktsüogo.
COVID-19 wara ya tebilemtsü tulu ka lir aser iba anema inyakba nung volunteer temi yariteptsüla, ta pai ashi.
Aapda Mitra Scheme kübok volunteer temi mozü, chiyungtsü, abensüoshi aser tanga osettem matamabensar, tain aser nüngdakbapurtem nem agütsütsüba nung yariteptsü. Maneni parnoki COVID-19 indang osang prokshiba nunga yariteptsü akok aser nüngdak dang adokra volunteer tem COVID-19 azüoktsü atema tesayubatem agütsütsü, ta paisa shisem.