Nagaland nungi prangpong-injang shibelener 3 apu

Jorhat, June 28 (Agencies): June 27, 2019 nü Lahowal police aser Changlang police yaritepa telungpurtem mita aodang nisung asem apu.
Dibrugarh district kübok Mohanbari anasa police-i prangpong shibelener nisung asem apu. Par asem rongnung tetsür ka dena lir.
Police-isa par asem ket nungi army sübotsütem, AK 56 rifle ana, magazines 2, herbal mozü taseptsü ana aser tanga osettem apu.
Par asemji Badrul Alom, Sainu Uping aser Akuya Uping nungertem aser parnok ajak ya Arunachal Pradesh kübok Changlang district nungi lir ta police-i metetdaktsü.
“Onoki osang ka angazüka liasü. Lahowal police-i Changlang police teyari agia gari ka soter mita aodang prangpong-injangtem apu” ta Dibrugarh Superintendent of Police Subashini Sankaran-ia ashi.
“Jemson Tiniali nung onoki sports utility vehicle ka sot aer idangji prangpong-injang aser tanga osettemji apu” ta Dibrugarh Additional Superintendent of Police Dhrubajyoti Bora-ia ashi.
“Mezüng asüngdangya asüdang parnoki osettemji Nagaland kübok Dimapur nungi bener aruba liasü ta shiogo. Gari (registration number AS 23 N 0173) nung parnok mener aru saka onoki iba kuliji ano mengutet lir” ta SP-isa ashi.