Nagaland nungi sample 22 ‘negative’ putetogo: Kronu

Kohima, March 30 (TYO): Nagaland nungi novel Corona virus indang sample 22 tendangtsü bener yokba ajak ‘negative’ ta putetogo.
“Nagaland nungi COVID-19 sample 22 ji Assam nung Guwahati & Dibrugarh aser Manipur nung Imphal-i tendangtsü bener yokba liasü,” ta Planning & Coordination Minister aser COVID-19 Nagaland atema sorkar otongdar, Neiba Kronu-i tanü ashi.
“Nisung 4,096 tashi kidang aser quarantine centres balala nung quarantine asüba nungi nisung 502 tashi mapang süiogo aser March 6, 2020 sülen tangalen nungi arur 3,594 tashi quarantine nung lir” ta Dr Suokhrie-ia osang metetdaktsü.
Tanü Nagaland Governor R N Ravi-ia DGP, Principal Secretary Home, Principal Secretary Health & Family Welfare aser tanga ketdangsertem den COVID-19 wara indang osang metetpelaa liasü, ta Minister Kronu-isa metetdaktsü.