Nagaland nungi train & tayimtsü ajanga tsünüsenbongtsü belentsü

Dimapur, September 27 (TYO): Dimapur nung Northeastern Frontier Railways aser Air India o Indigo dena Airline operator temi tangaleni chiyungtsü bener aotsü mulunga agizükogo.
Iba mapa ya State Horticulture Department nodal department ser inyaktsü. Chiyungtsütem rongnunug süngjanglijang, aonsotsü aser tsünütsütem dena lir.
Hokolbarnü Dimapur nung Commissioner & Secretary, Y. Kikheto Sema, IAS aser Director, Dr. Elithung Lotha nati Railways aser Airline ketdangsertem den ajurutepa senden ka amendang Horticulture Department dang tebang agi nangzük.
Dimapur Railway Station nung mezüng senden amendang Kikheto-i “state nung tsünüsenbongtsü aser süngjanglijang atema nodal department ji horticulture department lir aser train ajanga tangalen bener otettsü” ta ashi.
Idangji railway ketdangsertemi High Powered Vehicle Vans ajanga khu 18 tonnes (18, 000 kgs) aser 23 tonnes (23, 000 kgs) benteter, anungji aonsotsü aser tsünüsenbongtsütem bener otettsü ta langzü.
Nagaland nungi mapang shia train ajanga cardamom aika bener aoer ta railway ketdangsertemi osang metetdaktsüba atema Commissioner & Secretary-i Horticulture Department ketdangsertem dang “tiyongtsü nung mapa inyakertemi cardamom ayimertem nungi tajangzük agia alitsü anungji iba inyakyim anendaktsütsüla” ta tetuyuba agütsü.
Aluyimertemi jenjang shitak angutsüba indang tebilemtsüji Horticulture Department indang lir ta paisa shisem.
Tanü senden nung railway ketdangsertemji Station Manager Soumendra Mazumdar aser Commercial Supervisor (Parcel) Dimapur Railway Station Santunu Dutta nati anir aden.
Tanü Dimapur Airport nung Director Mughavi Zhimo; Station Manager, Air India Ltd M.K. Saha aser Airport Manager, Indigo Ratnadeep Dutta nunger den senden amendang Kikheto-i tayimtsütem nung khu abentsü atema cargo space lemzüktsütsü atema mepishi.
Ibaji airlines ketdangser anaprongi mulunga agizük aser Horticulture Department den yariteptsü mulunga lir ta ashi.
Maneni, Kikheto-isa Dimapur Airport Director Mughavi Zhimo dang airport infrastructure telatet nung Horticulture Department nem tawa ka agütsütsü mepishiba agizük.
Dimapur Airport nung Common User Domestic Cargo Terminal yanglutsü ta Mughavi-isa ashi.