Nagaland o Assam na Lengri ayong agi arrer : UNTABA

Dimapur, April 07 (TYO) : Dimapur anülulen tsütsü Assam den Lengri ayong agi Nagaland arr ladanga lir ta tanü sangdong ka ajanga UNTABA teloki metetdaktsüogo. Lengri ayong ya Assam nung Khakati anasa Lahorijan nungi NH 36 anasa Rilan yim tashi ayimer aser Rilan yim ya Nagaland sorkari 2013 küm recognize süa lir, anungji Nagaland kübok aliba yimtsüngtem nung kiojen bendokja meindoktsü kari danga merangra, ibaji temzüng ozüng anema asütsü aser iba jagi nüngdak maliba timtem jaoker asütsü ta parnokisa metetdaktsü.
Taoba anogo ishika jakdang, Dimapur anasa Karbi Anglong district administration-i arrtsülen kiojen yanglua aliba ajak bendokja nübortem meindokogo ta osang prokba ajak to tiyazü osang liasü, kechiyong Assam tsütsü 6th mile aser Deobar bazaar temeket nung temelaba melii alirtem aser Nagaland tsütsü Disapur, Kukhuribosti, Notunbosti,Tillabosti, Jarunallabosti aser Dikrongsa ama tesemtem nung alirtem ajak kecha timtem majuuri shitak lidagi ta kasa sangdong nung UNTABA tir Wb.Hukavi T Yepthomi aser tongti zülur Wb.Imsümongba Pongen nati metetdaktsü.
Sorkar meyong arem wazüka ayuba tesem nung ali atsünga arua alirtem meindoktsübaji Assam aser Nagaland state na prongla tata mapa asütsüla saka Assam sorkari Naga nunger meyong arem wazüka ayuba nung taoba alima aso 19 buba nungi tenzüka tangalen nungi nisungtem anidena lidaktsür ta UNTABAisa aitsü. Anungji, itemji Assam sorkari meindoktsüla ta parnokisa ashi.