Nagaland Peace Centre-i 52 buba Peace Day among

Kohima, September 6 (TYO): Bodbarnü Hotel Japfu nung Nagaland Peace Centre (NPC) tenteter küm 52 ajungba sentong ka agi.

“Onoki iba anogo nung ‘Peace Day’ tushir. Iba anogo nung onok Tsüngrem tenüng asangtsü atema adenshir. Pai Naga aser India nunger dak ajungba aser taochi sayuba atema tenüngsang agütsür” ta NPC chairman, N. Theyo-i ashi.

India nunger lennirtem- Pandit Jawaharlal Nehru, Lal Bahadur Shastri, Indira Gandhi, Deve Gowda, P.V. Narasimha Rao, Atal Bihari Vajpayee aser tang prime minister teinyakdak Narendra Modi aser par sorkari sepaitem tashi agi masü saka yimten olemtep ajangadang Naga yimten tebilemtsü atema telemtetba ka agitettsü ta shisateta mapa inyaka arur, ta Theyo-isa ashi.

“India linüki Naga nunger putiotsü balaka ta asüba ajitetogo aser ibaji ajanga yimten ken o atema telemtetba ka agitsü jangrar” ta paisa shisem.

Nagaland Baptist Church Council lennirtem Rev. Longri Ao, Kenneth Kerhuo aser tangartemi Nagaland nung yimjung bener arutsü asoshi mapa inyakba atema Naga nungertemi parnok dang pelatsüla.

Wokha nung January 31 nungi February 2, 1964 tashi Baptist Convention amungdang India sorkar aser taoba NNC tir asür Dr. A.Z. Phizo tsüngda yimjung olemtep tenzükba pelashishia agizük. Iba mapang Peace Mission ta ser asür Jayaprakash Narayan, NPC, Kohima, tentetsang asür Rev. Michael Scott aser asür B.P. Chaliha nungertem züngsem ser tentet, ta Theyo-isa ashi.

Küm 10 tashi ozüng alema mapa inyakba aser azütokshitepba sülen September 6, 1964 nü ceasefire tenangzükba agi aser India sorkari yimten telemtetba ka agitsü atema yimjung olemtep tenzüktsü maongka agütsü, ta paisa shisem.

Nisung ajaki Naga Yimten tebilemtsü lemtettsü atema yariteptsüla saka Naga linük tenzükertemi melongjemba angudang temulung raksar. Asenok melongjemba aser meputepba ajanga yimten ken o atema telemtetba magiteter, ta  NPC chairman-isa sasa bilemba jembi.

NPC-i Gandhi Peace Foundation, New Delhi den tesentaktep tajung yur mapa inyaker. India sorkar den olemtepba Naga nunger teloktem den state sorkari mapa inyakba onoki pusema nungiter. NPC-isa FNR aser arogo lennirtemi putepshitsüba aser yimjung bener arutsü atema mapa inyakba pelashishia agizüker aser pusema nungiter, ta paisa metetdaktsü.

August 3, 2015 nü NSCN (IM)-i India sorkar den frame work agreement sign asüba ajanga Naga yimten tebilemtsü indang mapa jenjang balaka nung ajungketogo aser iba ajanga Naga nunger ajak atema telemtetba tajung ka agitsü imlar. Naga nunger lennirtemi ano India sorkar den ceasefire nung aliba tanga teloktemi India sorkar den yimten olemtep alitsü mapa inyakba pelashishia agizüker aser NSCN (K) o Adinno Phizo-i aniba NNC teloktemia yimjung maparen nung adentsü mepishir, ta Theyo-isa ashi.