Nagaland Pensioner’s Association Tuensang Unit jubilee among

Dimapur, March 2 (TYO) : March 1, 2016 nü Nagaland Pensioner’s Association Tuensang Unit küm metsür pungu ajungba jubilee mungogo.

Iba benjungmung nung tongti tesemdangerji Fire Service & Renewable Energy Parliamentary Secretary, Toyang Changkong liasü aser pai Jubilee nüngo sayatsü.

Parliamentary Secretary Toyang-i tongti tesemdanger o jembidang, pensioner tem mapa nungi anisüngzükbji tatem masü saka taküm nung pei lokti aser Naga nunger asoshi mapa inyaktsü atema tapak tasen ka tenzükba lir, ta ayongzük.

Sentong nung tetushi süa jaoker, Tuensang Deputy Commissioner, Alem Jongshi-ia pensioner tem ayongzüka o jembidang, arishi moatsüba atema Tsüngrem nem tenüngsang agütsütsü ashi.

Pensioner temji sorkar mapa nung pei lemzükba kümsük tembanga inyakertem lir aser maneni arishia aodang lokti asoshi mapa inyakang, ta Alem Jongshi-isa ayongzük.

Sentong nung CKS Tuensang tir, Nokshang Chang-i Pensioner’s Association indang osang tatsü agi metetdaktsü, Association Secretary, Thsalicho Sangtam-i Tuensang Unit Pensioner’s Association osang metetdaktsü aser Association President, S. Ato Chang-i tasürtem bilemtetba mapang agi.

Sentong nung mendenji L.S Alemba (Rtd. Dy. Director Education) liasü aser Planning Committee Chairman, T.Y Sangtam-i anküp tepela o jembi.