Nagaland Police 508 training tembanga mapa nung shimok

Dimapur, November 09 (TYO): Nagaland Police atema küm ka jungnüa training tasak aika agia aruba sülen Brihostibarnü Nagaland Armed Police Training Centre (NAPTC), Chumukedima nung police 508 ‘passed out’ süogo.
Tanü NAPTC ground nung DEF/ PHQ/ NPTO aser Excise recruits constable 64buba batch attestation parade nung tasenpurtem den jembidang state Home Minister, Y Patton-i, “Tanü nungi lokti atema na ya kanga tongtibang nisung ka kümogo, aser khuret abenba nisung ka kümogo, anungji joko na taoba mapatem ama zübazülema malitsüla, saka nüburtem kümzüka alitsü atema kanga yakyaka alitsüla,” ta ashi.
“Nübur tenzüktsü atema nai police service nung adentsü telemtetba agi. Joko nai nüburtem tenzükba wadang nung nendaka inyaktsüla, kechiyong tanü nungi na nübur tenzükba mapa nung nokdaker,” ta Patton-isa ashi.
Police omen ‘Security, Service & Sacrifice’ nung ajemdaker Patton-i, police mapa nung tang tasenpur ka ama pei taküm tenla agütsütsü jenjang tashi nai nüburtem taküm aser lokti kiojen kümzüktsü asoshi nü nem mapa nungloktsüogo, ta ashi.
Minister-isa tasenpurtem dang temelung illa malitsüla, iba den külemi pei mapa pungpapungpa magitsüla, ajisüaka asen nüburtem ajungmesor ka asütsüla, ta ayongzük.