Nagaland Police Dept. nung ozüng alema nisung 229 shimok

Dimapur, December 9 (TYO) : Nagaland Police Department nung ‘backdoor’ ajanga nisungtem shimokba atema S.T. Yapang Lkr (Temsuyapang)-i RTI ka benokba nung telangzüba anguba nung nisung 229 tashi tim mesüi shimokba aser talisa parnokji Nagaland nung alirtem masü saka non-indigenous inhabitant tem ta osang ngutetogo.

2013 nungi 2016 tashi Police Battalion, DEF, NPTO, Police Engineering Project aser PHQ kübok Constable, NCE, Driver, Cook, Tailor, Cobbler, Washerman, Painter, Mechanic, Electrician, Handyman, Jugali mapatem nung item nisungtemji ozüng alema shimokba liasü.

Iba onük asoshi Gauhati High Court, Kohima Bench nungi N.M. Jamir, Advocate-i Director General of Police, Police Head Quarter, Kohima nem Legal Notice ka agütsüogo.

DGP nem agütsüba tetuyuba nung, anogo 30 tsüngda mapa 229 asoshi nisungtem ozüngi melaba inyakyim ajanga shimoktsü shia lir.

Police department nung mapa 229 asoshi nübotem shimokba nung Nagaland State sorkari Backward Tribe atema reservation policy aliba nung ajemdaker agitsüla, ta N.M. Jamir-isa DGP dang ashi.

Mapa 229 nung nisung shimokbaji Nagaland state nung zünger mapa mongui aliba lanurtem nem memetetdaktsüi ‘Back Door’ ajanga shimba liasü. Tanü asen state nung zünger mapa manguba lanur 80,000 den teimba lir aser talisa asen state nung employment ji State Government sectors/departments dak imlar.

Nisung 229 rongnungi nisung 11 ji Nepal linük nungi lir aser nisung 39 bo permanent address tim agüja mali. Tanüngba nisungtemji Bihar nungi 109, Uttar Pradesh nungi 48, Assam nungi 13, West Bengal nungi 4, Kerala nungi 4 aser Maharastra nungi 1 lir, ta sangdong nung shia lir.