Nagaland police-i ken o jangjashitsü

Dimapur, Mongputeni/October 22 (TYO): Social Media aser osang kaket balala nung police temi pua aliba hon telong kar sama aser iba dak sendakba nung police 13 anema ken o benoka lir, ta osang prokshiba ya tai, ta Nagaland police-i sangdong ka ajanga metetdaktsüogo.

Ken o ya tatalokba balaka indang lir, kong September 10 nü Narcotic PS nungi police 13-i hon telong 10, tetuyuba sülen manidaki benshia liasü. Iba dak sendakba nung aibelena aliba sepai 13 anema State Crime PS nung ken o ka benokogo.

Maneni aija aliba sepai 13 prongla ya mapa nungi anentsür lir aser inyakyim nung aibelenba indang ken o maneni bushisüngdangdar.

Police-isa, ken o tanga ka nung Narcotic Cell PS nungi team kati Narcotic Check Point, Khuzama nung October 3 nü hon telong 290 puogo. Iba ken o dak sendakba nung nisung ana puogo aser State Crime PS nung October 5 nü ken o benokogo, ta metetdaktsü.

Ken o anaprongla nung apuba hon tem police ket nung lir aser samaba ken o kecha mali. Ken o anaprongla tang bushisüngdangdar, ta kasa sangdong ajanga metetdaktsü.