Nagaland Police-i ‘Lottery Scams’ nungi jenbua alitsü metetdaktsür

Dimapur, February 15 (TYO) : Nagaland Police-i sangdong ka nung nübortem dang ‘Lottery Scams’ nungi jenbua alitsü atema mepishia metetdaktsüogo. Parnokisa ashiba agi iba dak sendakba ken o aika tang tebushidak lir.
“Lottery Scam” ya advance-fee fraud ka lir aser iba inyakyim nung email ajanga mesüra phone call mesüra Text message (SMS) ajanga “Na sen aika senpet nguogo” ta ashir, ta SP (Crime), M. Tungoe, IPS-i sangdong nung shia lir.
Senpetji agizüktsü atema sen enokjang ta ashikülakertemi ashir aser iba senji meyipa angutsü kanga tasak lir. Ticket ka mali tashi nisung kati lottery prize angutsü makok aser shitakba Lottery asayartemi senpet nungi fees, tax, bank charges, courier charges amala katizüker ang agütsür aser advance fee memeshir, ta paisa ashi.
Police-i nübortem dang ibala mesükba senpettem agizüktsü memerangtsü atema ayongzüker aser iba dak sendakba osangtsüsang metetpelanürtemi e-mail NagalandPolice16@gmail.com mesüra crimebranchphqkma@gmail.com den tongteprateptsü akok, aser ano FB page “CID Nagaland” nunga osang tejangja angutsü, ta M. Tungoe, IPS-i sangdong nung metetdaktsü.