Nagaland Police-i National award for Smart Policing angu

Dimapur, May 7 (Agencies) : Federation of Indian Chamber of Commerce & Industry (FICCI)-i Nagaland Police nem ‘National Award for Smart Policing’ agütsü.
Nagaland Police-i SMS-based Vehicle Monitoring System inyakyim tenzükba atema iba sempet angu.
Hokolbarnü New Delhi nung Union Minister of State for Home Affairs, Haribhai Parathibhai Chaudhary-i Nagaland Police nem iba sempet agüja liasü.
Road Safety & Traffic Management telemsa kübok Nagaland Police nem Best Practice sempetji agütsü.
Linük nung best smart policing indang presentation agütsürtemji state trok nungi police tem liasü aser parnok rongnung Nagaland Police dena liasü.
Nagaland Police Department-i SMS-based Vehicle Monitoring System apitet aser IIT Delhi nungi post-graduate aser Elysium Enterprises kibur, Ben Imchen-i iba ya mapa küma tenzüktsü. Iba inyakyim ajanga state nung gari samaba osangji police aser public temi SMS ka yokba ajanga tesem balala nung aliba police tem dangi osang prokshiteter.
Nagaland nung iba inyakyim ya April 2015 nungi tenzük aser iba ajanga gari auyaba kanga ajema kümogo. Tang tashi nung iba inyakyim ajanga samaba gari 100 den timba ngutetogo.