Nagaland Police (Red)-i 17 buba NSF takok marok agizükogo

Kohima, October 22 (TYO): Nagaland Police (Red) teloki final asaya koka, 17 buba NSF Martyrs’ Memorial Trophy asayamong takok marok tanü, Honibar nü agizükogo.
Taoba mapang, 2007, 2008, 2010 aser 2013 densema, Nagaland Police teloki tan agi NSF asayamong takok marok 5 benbuba agizüker lir.
Nagaland Police teloki goal 2-1 agi Forerunners Football Club, 4th NAP final asaya nung tsükdaktsü.
Tanü asaya tanabuba shilem tenzüker minute 8 buba nung Matthew Kezose Angami-i külem asayar, Vekhrüto Resu-i renemtsüba pass ball agizüka goal agütsüba ajanga par Forerunners telok temaba jenjang nung ajungkettsü.
Ajisüka, minute 5 süir külen, asaya tenzüker minute 59 buba nung Nagaland Police asayar, Lipok-i goal meyipja par telok anaprongla kasa jenjang kümdaktsüba sülen külem asayar, Sakutemjen-i asaya tembangtsü minute 3 anünga alidang tanabuba aser takokba goal agüja, par Nagaland Police telok champions kümdaktsü.
Nagaland Police (Red) teloki takok marok agizükba den kulikaket aser senpet sen lakh 1.60 agizük aser Forerunners teloki tanabuba takok marok den kulikaket aser senpet sen lakh 1 agizüka liasü.
Nagaland Police (Blue) telokia 3 buba jenjang takok marok den kulikaket aser senpet sen 50,000 agizük aser Barak FC teloki 4 buba jenjang takok marok den kulikaket o senpet sen 30,000 agizük.
Individual shilem nung Nagaland Police (Red) asayar, Atun Konyak-i Player of the Tournament; Forerunners nungi Lhiwete Koza-i Best Goalkeeper; Nagaland Police (Blue) asayar, T. Toshi Longkumer-i Best Defender; Barak FC nungi Nampi Rentta-i Best Midfielder; tan asayamong goal 12 tashi agütsüsang, Nagaland Police (Red) asayar, Kekhrieletuo Tsira-i Highest Goal Scorer aser Senapati FC teloki Best Disciplined Team takokba anguba osanga angazükogo.
Ano külen, “ASU-i kümshi asayamong takok ngua ayongba atema par tentet dang pelaba lemsateper aser Naga nunger lokti tentet nung tashiji temeten ta benshiba sobaliba tamajung agiener nüburtemi tali lungjema alitsü ajungshir,” ta tanü takoker nem sempet/senpet agütsüba sentong nung tongti tesemdanger, Nagaland School Education & SCERT Minister, Yitachu-i ajungshia liasü.