Nagaland police ya ajak dang tajungtiba: Neiphiu Rio

Dimapur, February 16 (TYO): “Nagaland police ya disciplined force ka aser ajak dang tajungtiba lir ta züngshir. Anungji police-i iba ya teti bilemtettsüla aser taküm libaliro azüoka aliba den uniform akhümtsübutsüla” ta Chief minister Neiphiu Rio-i ashi.
Naga nunger ya tasü tait kin ka lir aser iba jagi asenoki state aser linük tenzükba wadang nung yakyaka, tashi angaa aser bendanga agüja inyaktsüla, ta Rio-isa ashi.
Honibarnü NPTS ground, Chumukedima nung 65th Batch of Basic Training indang passing out parade sentong nung Nagaland Chief Minister-i iba olen jembi.
Nagaland police nem mapa lemzüktsüba tesem ajak nungi konang nüngsang bener arua lir. Asen lima nunga police ketdangser aser sepaitemi tensa süngjema ayutsü atema kanga dang jeretperaa mapa inyaktsüla, ta pai ayongzük.
Iba training tembangba ya tetenzüker dang lir aser nübortem tenzüktsü atema küm aika lir. Tanü iba parade nung shilem agiba police shiai ‘Security, Service and Sacrifice’ motto teti bilemtettsü mepishir, ta Rio-isa ashi.
“Tanü tazünger aikati police force nung adenba anguba tali ajungmesor. Tanü putu nung ozüng alema inyaksangshi melena inyaker aser iba ama mapang ka nung police-i shia meteta alitsü nüngdaker. Tazüngertem shirnok constable ama mapa nung shimoker, nenoki tarutsü maongka ajurutsü” ta paisa shisem.
Training centre tem nung aliba staff ajak nem instructors allowance ama basic pay nung 15% extra allowance agütsütsü, ta Neiphiu Rio-isa metetdaktsü.
Paisa, Principal, Police Training School (PTS) aser training staff ajak nem tenüngsang agütsü.
November 1, 1966 nü amenokba nungi PTS ajanga basic training agütsüba mapa takok ngua inyaka arur, ta paisa ashi.
Mahila 38 dena recruit constable 390-i ita 9 training takok ngua tembangogo.

65th batch nung sempet angurtem:
* Best in turn-out – Melong, DEF, Tuensang;
* Best in physical training – Nipavi Achumi, DEF, Zunheboto;
* Best in drill – Sedo Medeo, DEF Kohima;
* Best in weapon handling – Seisanglen Haolai, DEF Mon;
* Best in firing – Zacharia P.Rosu, DEF Kohima;
* Best in legal studies – Phaphal Thomson, INT Kohima;
* Best in police science – Phaphal Thomson, INT Kohima;
* Exemplary conduct – Langkhio, DEF Mon;
* All round best – Melong, DEF Tuensang.