Nagaland ‘politician’ tepsettsü tasa atongertem tatem tashi bushitsü

Dimapur, May 20 (TYO): Ozüng alema mapa inyaker Vijay Farmana aser pa den yaritepertemi Nagaland nung ‘politician’ ka khasettsü jembitep ta taoksatsü osang sangoktsüba jatema Nagaland nungi BJP lennirtemi tanü MoS (MHA) Kiren Rijiju den ajurutep.
Deputy Chief Minister aser Nagaland BLP lennir Y Patton den BJP MLA tem Dr. Longrineken Ao o Khehovi Yepthomi nungertemi tanü New Delhi nung Kiren Rijiju den par kidang ajurutep.
Tepsettsü tenük yokba ‘politician’ aser iba atema sen aser Ford Endeavour gari agütsür maitsütem jangjatsü atema MHA-i mapa inyaktsü aser timi bushisüngdangtsü mepishir, ta Nagaland BJP lennirtemi Minister of State Rijiju dang ashi.
Nagaland Deputy Chief Minister Y Patton ya Home Minister incharge lir aser pai Rijiju dang iba onük ya kanga dang süoki ia agitsüla aser iba atema Nagaland Police nung Inspector General of Police(IGP) jenjang nung ketdangser kati anir police telok kati Delhi Police den yariteptsü mapa lemzüktsüogo ta metetdaktsü.
Senden nung Kiren Rijiju-i Nagaland lennirtem dang Commissioner of Delhi Police dangi osang abentsü aser MHA-i iba mapa tatem tashi bushitsü ta nangzük.
Iba onük ya tekaratiba nung bushisüngdanga tembangtsü, ta Rijiju-isa shisem.
Nagaland BJP lennirtemisa Prime Minister Narendra Modi aser BJP President Amit Shah nati anir Central BJP lennirtemi Lok Sabha elections nung mapa tajung inyakba atema pelaba den tenüngsang agütsü.