Nagaland Pradesh Congress Committee-i züngsem 7 anentsür

Dimapur, September 30 (TYO) : Congress tenüng menüktsüba aser AICC, NPCC Executive aser mendenpurtem anema olulu prokshiba nung ajemdaker NPCC-i Congress züngsemtem – Subongmeren, Vaprumo Demo, Prasiele, Kongam, G.K. Rengma, Sulangthan aser Nilo Rengma nungertem telok nungi anentsür, ta NPCC sangdong ka nung metetdaktsü.
NPF-i aniba DAN sorkar nung adener MLA tem parnoki pusema nungiter aser ibaji NPCC aser INC Temzüng anema lir. Parnokisa kuli kecha melii NPCC Executive Committee aser NPCC Tir aija tezüluba agütsü, ta NPCC sangdong nungsa shia lir.
Anosa, parnoki tongti tesemdanger Narayanaswamy, Gen Secy AICC aser tetushi tejaoker Dr. K. Jayakumar, Secy AICC na tsüngdang yimya tamajung sayuba ajanga NPCC tenüng menüktsüogo aser PCC ketdangsertem memesük parnoki tena dang auer ta jaa aitsü.
Parnoki tim mesüi inyakbaji tashi mangaba inyakyim lir aser iba asoshi NPCC Executive Committee-i NPCC aser INC Temzüng nung ajemdaker tanga sangdong ka magütsü tashi parnok telok nungi anenja atatsü telemtetba agi, ta sangdong nungsa shia lir.
Parnok anenja aliba mapang züngsem mesüra luden shingaia parnok den meinyaksemtsü aser parnok nungi tetuyuba kecha magizüktsü, ta NPCC sangdong nungsa metetdaktsü.