Nagaland Pradesh Youth Congress-i state ajunga sema senzütsü

Dimapur, April 23 (TYO): Nagaland Pradesh Youth Congress (NPYC)-i taküm April nungi May tashi Nagaland state ajunga sema senzütsü sentong lir.
NPYC sangdong ka nung ashiba agi, state-wide tour (Organizational) ji shilem lemsar agitsü aser iba mapang lanurtem dang asen state nung maparen ajak nung ochimashi aliba agientsü atema tayongzükba agütsütsü.
Nagaland nung yimtenren, lokti, rongsekettsüng, tamangba yimsü kechisarena ajaklen meptemsü lir aser item onüktem asoshi lanurtemi loktiliba nung teküpokba jenjang tashi nung lua nübortemi ajuruba khuretem metettsü merangtsü, ta NPYC sangdong nung shia lir.
NPF-BJP-i aniba DAN sorkar nung ochimashi agi sünga lir aser ibaji media osangtem ajanga asenok teti angur. Sorkar department aika nung maparen tim mesüi aser meshitaki inyakba kulitem lir aser ibaji asenok asoshi khuret ka lir. Iba dak sendakba nung MLA C.M. Chang-i menden sür tentetba NLA Public Accounts Committee (PAC) dang public ajangzüktsü atema inyakyimtem ochishia bushi ayongzüker, ta NPYC-isa metetdaktsüogo.
Linük indang secular tangatetba akhümtsübur saka Nagaland ya Khristantem teimba sür aliba state ka lir, anungji onoki NPF-DAN ama masü saka maneni asen maitsü kümzüka ayutsü. Küm 14 tashi NPF-DAN-i tangar den tesentaktep tamajung yur, state nung telok balala tsüngda telemsa adokdaktsütsü atema mapa inyaka arur. Ajisüaka, iba ochimashi tangatetba aser yimyatem sülen lanurtemibo manidaktsü mepishir, ta parnokisa ashi.
Küm aika BJP-RSS nem anishidaktsüa aruba sülen tangbo NPF aser parnok den yaritepertem ajak BJP-RSS den kasa kümogo. Centre nung par kibur peladakja NPF aser parnok den yaritepertemi tenük amor ajak nung haihaura süa anidaker. Iba ya ajanga BJP-RSS miim tebilemba ataloktsü ana nung lir aser ibaji ‘Regional-Saffronization’ mesüra ‘Saffronized-Christian state’ atema lir.
Küm aika sülen asenoki BJP-Modi’er India Shining indang chichiba tebilemba jungkai adoka nguogo. India Shining kübok tamangba-sobaliba tsütsü mepetmesü, nashi kümzükertem, linük ka saru ka, sobaliba ka-tamangba yimsü ka, uniform civil code amala onüktem adokogo aser parnoki kobi melii Hindutva linük kümtettsü atema apusotsü, ta NPYC-isa metetdaktsü.
Anungji, Naga lanurtem dang onoki item lendong aketba tangatetba aser inyakyim ajitettsü ayongzüker. Iba tangatetba sülen asenoki manidaktsüla kechiyong iba ajanga asenok tsüngda meputep aser mepetmesü adoktsü ana nung lir. Onoki lanurtem dang shisadangtsü aser longjemtsü ayongzüker. NPCC Roadmap nung ajemdaker onoki sentongtem atongtsü aser asen tarutsü atema longjemer inyaka aotsü ayongzüker, ta Nagaland Pradesh Youth Congress-isa ashi.