Nagaland Press Association-i aitsür

Dimapur, Rongchii 19 (TYO): Sangtennü (Tuesday) mejangjab nisung anati Shillong nung The Shillong Times yimozülur, Patricia Mukhim’er kidang petrol bomb mereploktsüba asoshi Nagaland Press Association (NPA)-i khukhua aitsür, ta NPA tir-i sangdong ka ajanga metetdaktsü.
Lendong agütsüba yimya nung reprangdangra, parnok nükjidong ya ‘Fourth Estate’ nung inyakertem amokmerentsü merangba amai lir.
Tawa India nung iba ama osangbener dak lendong agütsüba ya ochi jembirtem ola madokdaktsütsü merangba lir, aser iba ajanga yimjung aser jembishinüba dak amangba lokti aser democracy anema inyaker, ta sayur. Osangbener nem timtem agütsüba ajanga linük nung tangar akhum tsübutsü aser züngshitsü memulungba tali akümba sayur, ta NPA ajanga ashi.
Patricia Mukhim ya Shillong, Meghalaya nungi adokba osangkaket yimozülur kisüng masü, saka la ya linük nung osangbener tejen aser linük nung tongtibang maparen aika nung kanga yakyaka shilem agia aru.
Patricia Mukhim dak lendong agütsüba ya Meghalaya, Delhi mesüra Nagaland nung süaka, Fourth Estate-i democratic jenjang nung yimjung aser jembishinüba kuli abenba akhum metsüpuba amai NPA-i züngshir.
North-East nungi osangbener tejen ka dak lendong agütsüba nisung tekeratiba nung pua tapet temerenshi agütsütsü asoshi Chief Minister Conrad Sangma-i aniba sorkar tasenba dank NPA-i tamang akar, ta kasa sangdong nung shia lir.