Nagaland Pulp and Paper Company Limited (Tuli Paper Mill) atema Naga nungeri ola adoktsüla

– T. Nukshi Yaden, Tuli.

Mezüngbuba Naga nunger ajaki iba NPPCL Tuli Paper Mill ya asenok Naga nunger ajak asoshi nüngdak, aser asenok meyong ta tangatetba alitsüla.
1960’s meta Government of India-i Nagaland nung ibala industrial development inyaktsü züngzüktepa ayu, aser iba nükjidong nung Nagaland Pulp and Paper Company Ltd. (NPPCL) ya 1971 küm Governtment of Nagaland aser Hindustan Paper Corporation Limited (HPCL) na telongjem nung inyaktsü (joint venture) bangjemer tenzük. Iba project tenzükba tongtibang nükjidong kaji tajangzük kisüng atema masü, saka Naga underground telok surrender asürtem nem mapa agutsütsüba (Rehabilitation) onük aser sentong tena lir ta angazüker.
Iba mill amenoktsü aser staff talitsü ki asütsü asoshi asenok Naga nunger iba temeket alirtemi ali 700 acres tenla agutsüogo, aser ano ali 126 sq.km longmi aser arem awatsü alizüka lir iba project 1981 küm commissioned asü aser paper 1982 kum nungi menünga adok tenzüka liasü. Saka asenok Naga nungertemi item industrial inyakyim junga memetet, aser iba ya asenok atema kanga tongtibang ta bilema mali doktsüdang oset komala mesüra koma amentepba yanglur, ta kecha mashishi doktsü aser ajaayangertemi junga ajaayanga masüba ajanga iba paper adoktsü mapa October ita 1992 küm nungi anenaadok. Saka HPCL aser management temibo alima tensa mapang majungba aser light current supply peria manguba ajanga anener ta sangdong, saka idangjia asenok Naga nunger temi süoki ia mebilem doktsü. Ano maneni 1995 küm iba mill asentenshia tenzüktsü asoshi Centre sorkari Rs. 1650 lakhs sanction asü saka idangjia HPC-i “Situation due to law and order is not applicable to revive NPPCL” ta tiyazü kuli amshia kecha meinyaktet. Ano maneni 29th May 2007 küm nunga Rs. 552.44 crores lemzükja ita 27 nung iba mill renemtsü temelaba agutsü. Iba sen nungi mezüng shilem ta sür Rs. 54.60 crore 17th September 2007 nung agizükogo. Tang joko October 2016 tashi nung ita 113 abensaogo saka ano kecha teinyakba temong mali aser iba sen agizüka amshiba tejangja mesayuteter. Mapabo kecha meinyak saka ano 30th March 2009 küm HPCL Kolkata nung mezüng approved süa aliba Rs. 552.44 crore jagi merenemtettsü ta shia ano DPR, tasen ka Rs. 1241.80 crore yanglua Heavy Industries Government of India dangi yok. Shidakba agibo mezüng lemzükja aliba senji amshia inyaker merenemtetba tanüngba mapa asoshiji sen tali meshia jembitsü tim liasü.
Saka HPC jagi iba tasenba DPR temelaba mangu tashi NPPCL tenzükshiba inyakyim anena atatsü ta lemteta yua lir.
Aji oda yamai aiben sen lemzükja iba NPPCL tenzükshitsü tenüng nung meshizükli parnok ajaayangertemi aji chirepli ano tanaben meshili ta par senpong asüngtsü ariteper tang ashi iba Tuli Paper Mill ya yanglushitsübo kangabo teimlatsü mali ama par inyakyim ajanga angateter. Joko employers tema 1400 tema liasüba retired tesümar parnok 138 tang anünga lir. Tang anünga aliba satff aser workers ajakji alumarbo tesüsa mill ya loker aotsü aser asenok Naga nunger tang amai cinema repranger amai repranga atar “The End” ta adokdang pakshi ama tu asütsü.
Koda asü tanü tashi Naga nungertemi iba mill ya asenok ajak indang ama mebilemer aser züzüa doktsür. Iba ya Tuli area pur, mesüra tzükongpur indanga masü Aor kisüng indanga masü, saka asenok Naga nunger ajak meyong anarongtena Nagaland nung iba industry ya dang lir, anungji ya kümzüka ayutsü asenok Naga nunger ajaki shilem agitsüla. Asenok Naga nungertemi tanga ken o aser mapa nungbo kanga sashia shilem agia rarar aser jembiteper, saka tanü tashi iba paper mill atema lokti tentettemi ola adokba mangashir. Tuli area Joint Council ajanga aiben management aser Government of Nagaland den jembir saka kecha temong maka aser tang tashi Naga nunger lokti tentet paikati oda Ao Senden, AKM, NSF, Naga Hoho, CNTC, NTC, ACAUT amala katia ya koda? ta asüba mali ya Tuli area pur kisüng indangbo masü ato.
Anungji joko Naga Hohoi anir iba atema Naga nunger Schoolar tem Delhi yimtiba nung jenti ka lirji künübo parnokia Delhi nungji ola kabo adok yariogo. Aji oda asenok Naga nungertem yangi Nagaland nung ya nemnemtepa mekazüi joko India nung yimtiba Delhi nungji oagi Naga Hohoi anir yimyim ka ayimoktsü nungbo ya koda asü ? ta kar narongbo arepzütsü ta bilemer. Anungji Naga nungertem arungma, tanga industries tasen bener arua lapoktsübo kanga meimlali, saka asen ket nung tang aliba ka ya tanga kümzüka ayutsü ken süoki yiti ta lemsateper.