Nagaland PWD-i künü nung Junior Engineer 21 shimok

Dimapur, September 28 (TYO): 2005 nungi 2015 tsüngda State PWD nung Junior Engineers (JEs) 171 shimba rongnungi NPSC ajanga 110 shim aser tanüngba nisung 61 jibo backdoor ajanga shim, ta Media Cell, ACAUT Nagaland sangdong ka nung metetdaktsü.
Ano kanga dang tesüngmangtsükaji department-i künü yongi Junior Engineer 21 shimok aser ibaji May 22, 2015 nü liasü, ta ACAUT sangdong nung shia lir.
State PWD-isa June 28, 2012 nü backdoor appointee ama JE 10 shimoka otsü tasen yanglu saka May 22, 2015 nü iba otsüji ajatetogo. Ajisüaka, iba kasa mapang nung NPSC ajanga SDOs 53 shim.
NPSC-i June 2015 nung JEs 18 aser SDOs 5 atema Combined Technical Services Examination (electrical, mechanical, civil, etc.) agitsü maparen teinyakdak nung Nagaland PWD-i miima JEs 21 shimok. Iba jagi tetemjen nübotem mapa mongudaktsü aser ano NPSC ajembang, ta ACAUT-isa ashi.
Anosa, 2008 aser 2015 tsüngda Section officer- Grade 1 & 11, Section Assistant aser LDA menden 1092 nung nübo shimok. Shitakba agibo item mapa asoshi minimum qualifications ji graduate aser tema mesüra diploma in engineering liasü, saka department-i itemji mereprangidang shim, ta parnokisa shia lir.
Iba mapang nisung 1316 shimokba rongnungi parnok 1153 tashi backdoor appointment ajanga shim.