Nagaland PWD (NH)-i Dimapur gari lenmang indang osang jangjashitsür

Dimapur, June 19 (TYO): June 18, 2017 osangkakettem nung Dimapur nung gari lenmang majungba atema Chief Minister-i mapa inyaktsüla ta WSSU-i sangdongba atema Nagaland PWD (National Highways)-i tanü telangzüba ka agütsü.
Nagaland PWD (NH)-i sangdong ka nung ashiba agi, Nagaland Gate (Golaghat Road) nungi Patkai Bridge (Tragopan Jn- Zion Hospital Jn- Purana Bazar-Chumukedima adena) Dimapur (NH-29 & NH-129) City portion yanglutsü atema Ministry of Road Transport & Highways’ (MORTH)-i sen lemzüktsüogo.
Iba mapa ya Engineering Procurement and Construction (EPC) Mode nung inyaktsü atema State PWD (NH) nem lemzüktsü aser iba asoshi department-i National Bids meshia liasü. Taruba anogo ishika tsüngda MORTH nungi Tender Bids shimba aser sen lemzüktsüba osang metetdaktsü imlar, ta sangdong nung ashi.
Ministry nungi iba osang aruba sülen State PWD-i iba gari lenmang ya BRO ket nungi meshizüktsü aser mapa inyak tenzüktsü. Anungji, nisung ajaki temalen shia aliba onüktem nung ajemdaker, mapa metenzük tashi aremzüka atatsü mepishir, ta State PWD (NH)-i sangdong nungsa metetdaktsü.