Nagaland Raj Bhavan garitem nungi ‘red beacon’ agienogo

Dimapur, April 21 (TYO): Centre sorkari May 1, 2017 nung garitem nungi ‘red beacon’ agientsü tetuyuba agütsüba ama, Nagaland Angh-ia Raj Bhavan indang garitem nungi ‘red beacon’ tem agienogo, ta PRO to Governor sangdong ka nung metetdaktsü.
Democratic linük ka nung BIP sobaliba amshitsü madoker aser ozüng tsüngdang ajak kasa dang lir ta Angh-i ashi.
Tesem aika nung ketdangsertemi ochimashia inyakba aser VVIP sobaliba anema public-i ‘red beacon’ ya aitsür. Linük kübok tesem balala nung nisungtemi garitem nung sentsü temerem tesangwa enoker ozüng alema mapa inyaker. Police-i ‘red beacon’ aketba garitem soter mita reprangtsü tsübur aser iba jagi ozüng alema mapa inyakertemi ‘red beacon’ enoker mapa tamajung inyaker, ta sangdong nungsa shia lir.
“Prime Minster-i telemtetba agiba ni pelashishia agizüker. Asenoki iba inyakyim meshimeshia endoktsüla” ta Angh-isa ashi.