Nagaland RMSA candidate temi lungkak aitba anenogo

Kohima, October 27 (TYO) : Education Department Commissioner & Secretary-i mapa inyaktsü nangzükba sülen Nagaland RMSA Written Exam 2014 Qualified Candidate Forum-i lungkak aitba sentong anenogo.

State sorkari viva-voce result yimjak nung metetdaktsüba aser appointment orders magütsüba anema aser ano October 8 tashi nung sports instructor candidate atema viva voce agitsü takhangba agütsüba atema parnoki tanü nungi mapang tatazkzük makai lungkak aittsü telemtetba agia liasü, ta Forum convenor, Kakika Z Sumi-i osangbener dang ashi.

Taküm August 30 nü RMSA-i sorkar dang viva voce result metetdaktsütsü aser appointment order agütsütsü atema takhangba agütsü. Mapang atazüktsüba süiaka parnoki aremzüka dang ata aser October 20 nungi lungkak aittsü lemtet saka ibajia thinener sorkar nungi telangzüba ata liasü. Ajisüaka telangzüba kecha mangu nung parnoki tanü nungi mapang tatakzük makai lungkak aittsü tenzük, ta Kakika-isa ashi.

Lungkak aitba sentong nung candidates 500 shi adenshi saka RMSA State Mission Director-i parnok dang viva voce indang result renemogo aser Education Minister, Chief Secretary aser Commissioner Secretary nungi temelaba agitsü atema Secretariat-i yokogo ta ashi, ta Forum Convenor-isa shisem.

Tang ya Education Minister aser Chief Secretary naprong station nung mali, iba jagi RMSA Department-i result magütsüteter ta MD RMSA-i parnok dang metetdaktsü.

Iba nungji ajemdaker Forum executive temi Education Department Commissioner & Secretary, Philip Solo den oa ajurutep aser pai Minister aser Chief Secretary na aruba sülen November 10, 2015 matongdang result den appointment orders agütsütsü ta nangzük.

Commissioner & Secretary-i parnok dang nangzükba nung temulung alemba agi parnoki lungkak aitba sentong anentsü telemtetba agi, Kakika-isa osangbener dang ashi.

Kakika-isa ashiba agi, RMSA office kima nung lungkak aitba sentong agidang Naga Students’ Federation, Education Secretary, Imtiyapang-ia tayongzükba o jembi aser parnoki lungkak aitertem pusema nungitba metetdaktsü.