Nagaland RMSA tesayurtemi sorkar dang court-i tuyuba ama inyaktsü mepishir

Dimapur, Aami/June 05 (TYO): Nagaland RMSA Teachers Association (NRMSATA-2016) ajanga state sorkar dang RMSA 2016 batch atema court-i bhukumba pay scale mapa kuma amshitsü aser arrears magütsüi aliba agütsütsü ayongzükogo, aser iba ken o Supreme Court of India nung tembangogo ta ashi.

Brehostibarnü sangdong ka agütsüba nung, Gauhati High Court-i sorkari dang parnok mesük terayur nem agütsüba ama scale pay agütsütsü tuyuba bilemteta ashi.

Sorkar indang Special Leave Petition ya Supreme Court-i magizük aser iba sülen ano Review Petition agütsüba ajia January 15, 2026 nü magizük meyiptsü, ta ashi.

Obendang agüja aliba mapa kuma inyaktsü tanen makai menuba atema tebilemtsü akaba lemsatepdang, tesayurtem iba tajangzük agitsü küm aika ataa arur, ta ashi.

April ita nungi onok nem itasem magütsüi lir, anungji tesayur aser parnok kibong aika senotsü tsütsü timtem ajurua lir, ta parnokisa ashi.

Administrative inyakyim nüngdaktsü, ajisüaka tali menudaktsütsü atema kuli maka, ta ashi aser proposal ya departmental processes alemogo aser ozüng tsütsü tarendaktsü mali ta ashi.

NRMSATA-2016 ajanga sorkar dang iba obendang mapa kuma inyaktsü, RMSA 2016 batch tesayur nem tagütsütsü aliba arrears ajak agütsütsü aser itasen magütsüi alibatem tekeraba nung agütsütsü ayongzüka liasü.