Nagaland School Education Dept. tajungba akümtsü meranger

Kohima, February 4 (TYO): District Education Officers aser Sub-Divisional Education Officers-i sorkar tesayur nem transfer orders mashii agütsüba atema state sorkari centralized policy ka tenzükogo.
“Transfer agütsüba ajak sorkar ajanga dang inyaktsü” ta tanü School Education Advisor, K T Sukhalu-i metetdaktsü.
Ura Academy Hall nung All Nagaland Government Primary Teachers Association (ANGPTA) indang mezüngbuba lokti senden nung Advisor K T Sukhalu-i iba osang metetdaktsü.
“Meta talang pilar aliba tesemtem nung tesayurtemi temang nung aser kibong khuret ajurubaji onoki angateta lir. Item tesem nung alirtemi Dimapur aser Kohima-i transfer arutsü atema department nem application 10-20 agütsür” ta paisa ashi.
“Ajisüaka, sorkari Dimapur aser Kohima-i school ajak bener maruteter. State kinük ajaklen shisaliok angazükdaktsütsü atema sorkari tesayurtem shim. Onoki nenok nem tashiyim agi inyakdaktsür masü saka nü sasa iba mapa inyaktsü shimba lir. Anungji tesayurtemi department indang khuret angatettsüla aser peii lemzükba mapa shitak inyaktsü imlar” ta Sukhalu-i ayongzük.
“Kaketshir ka indang shisaliokji primary jenjang nungi tenzüker saka asen state nung iba tamendakdak tashimait lir. Anungji tesayurtemi pei school nung aliba kaketshirtemji pei chinurtem ama bilema sayudaktsünür” ta paisa mepishia metetdaktsü.
Sorkari indang non-detention policy ajanga tesayurtemi bendanga agüja meinyaker aser külen kaketshirtemia Class 8 tashi temulung magütsüi azümesener, ta paisa shisem.
“Nagaland nung proxy tesayurtem ayuba nung Village Council kari iba mapa nung shilem agiba kü tenük agia nguogo. Tesayur maruyonga sen 3000 agütsür yimtsüng nungi nisung ka proxy tesayur ama shima inyakdaktsütsü atema Village Council-i register dena yua lir. Asenoki iba tim masüba mapa ya inyakra, tarutsü putu raksatsür aser iba ajanga asen loktiliba menentsütsü” ta Advisor Sukhalu-isa khuret lemsatep.
Department-i school ajak nung Biometric system tangtangbo meinyakteter saka tan academic session nungi Teachers Dairy ka ayutsü aser iba nung tesayur shiai lesson plan aser maparen züluoktsü, ta paisa ashi.
Sukhalu-isa ashiba agi, department-i Assistant Head Master tem shimtsü atema interview agitsü telemtetba agiogo.
Sentong nung School Education indang Principal Director, Shanavas C-i o jembidang “Nagaland nung sorkar school tem majungba nung tesayurtem aser department ketdangsertem dena lir” ta ashi.
Nagaland nung education maparen tajungba kümdaktsütsü atema department-i ozüng lateta aliba ama inyaktsü aser meranga inyakba tesayurtem nem sempet agütsütsü aser proxy ayur aser mapai maoertem merenshitsü, ta Shanavas-isa ashi.
Iba sentong nung mendenji ANGPTA vice president (admin) Kivigho Zhimomi liasü, ANGPTA president James Ruokuoselhou-i tesentepertem pela agizük, ANGPTA Kohima aser Longleng unit temi ken atem aser ANGPTA vice president Chiru Thizu-i anküp tepela o jembi.