Nagaland SDG Vision 2030: Yimti aser jilatem tajungba akümtsü ULBs election magiba ajanga ketdangsübaren nung tetsükdaktsü ajurur

Kohima, August 29, 2021 (TYO): Nagaland state nütsüng yongsük nungi 71.14% tashi jila nungi pilar yimtsüngtem aser tanga tesemtem nung alir aser iba jagi sorkari parnok nem basic services tajungba agütsütsü nükjidong lir.

Iba ya Chief Minister Neiphiu Rio-i tawa sayaba Nagaland SDG Vision 2030 nung shia lir. 2011 Census ajanga linük nung nisung renlokbaji 21% lir saka Nagaland nungbo 69% ta shia lir.

Nagaland nung nisung kanga renloka aobaji state ajungalen masü saka Kohima aser Dimapur nung teimba lir, ta Vision Document nung ashi.

Jilatem nung alir teimba ka lanurtem lir aser parnoki mapa inyaktsü aser taküm liyonga aotsü atema lenmang sadema mangur.

Maneni, jilatem nung tang nüngdakbatem peria mangur aser item rongnung housing aser rongsenketzüng maparen lir. Iba ama tensa ka nung urban poverty tebilemtsü ajurur, ta Document nungsa shia lir.

Nagaland nung ali kibur inyakyim balaka amshibayong, terenlok mapa inyaktsü atema ali sadema mangur aser iba ya tayongzükba tuluba lir. Iba tebilemtsü ajanga mapatong aika inyaktsü tsükdaker aser ali ken o ajanga mapa aika meinyakteter.

Ali ken o tem aliba ajanga master plans aser development plans mapa küma meinyakteter, ta Vision Document nungsa shia lir. Nagaland nung yimtsüngtem nungbo ketdangsübaren kanga junga lir saka Urban Local Bodies (ULBs)-ibo iba mapa meinyaketer. Nagaland nung Municipal Council 3 aser Town Council 36 lir aser ULBs indang mezüng election ji 2004 nung agia liasü saka iba sülen tetsür nem shilem 33 lemzüktsütsüba onük ajanga election magiteti arur aser iba ajanga urban governance system nung tetsükdaktsü tulu ajurur, ta Vision Document nungsa shia lir.

Iba tebilemtsü atema state sorkari 2030 küm tashi nung yimti aser jilatem tajungba kümdaktsütsü sentong renemogo. Sorkari gari lenmang tasentem aser administrative headquarters yanglutsü mesüra mapa tasen kar inyaktsü, ta document nungsa shia lir.

Ajisüaka, ozüngi melaba ama ketdangsürtem meshimra ULBs nem tashi magütsüteter anungji tekaratiba nung Municipal election agitsüla, ta Vision Document nungsa shia lir.

Neiphiu Rio-i aniba sorkari 2030 küm matongdang state ajungalen Economically Weaker Sections (EWS) households alitsü atema kiojen 35,000 tashi yanglutsü sentong lir.

State sorkarisa ULBs ajak nung septage aser waste management yanglutsü tebilemba lir. Sorkarisa toilet coverage & adequate public mesüra community toilets 100% aser mozü kitem nung bio-medical waste segregation 100 % yanglutsü sentong renemogo, ta Nagaland SDG Vision 2030 nungsa shia lir.