Nagaland Secretariat Service Association Hon Jubilee mungogo

Dimapur, Luchii/December 10 (TYO): Nagaland Secretariat Service Association (NSSA) Hon Jubilee, December 10 nü Secretariat Park, Kohima nung “Braced to Excel” omen nung ajemdaker mungogo. Iba sentong nung Deputy Chief Minister of Nagaland, Y. Patton alakteta jaoker liasü.
Sentong nung o jembiba mapang Patton-i, küm tenem ajungba anogo Association nem tenüngsang agütsü. Küm tem tsüngda association-i jenjang temaba nung inyaksangshia aruogo aser iba ajanga iba telok ya loktitem rongnung temaba ka ama züngshir. Iba lokti ya sorkar inyakyim ajak teyongtsü nung amenoka lir aser state sorkar policy yanglurtem den tanen makai inyaker, ta pai ashi. Paisa, park anepaluba atema Association nem tenüngsang agütsü, koba secretariat nung inyakertem dang masü saka tesemdangertemia jangradema amshitsü, ta ashi.
Maneni Patton-i, Jubilee amungba ya mezüngpurtem aser lenirtem bilemtetba mapang lir, shirnoki nükla tajung yur bendanga agüja inyakba ajanga Association iba jenjang tongtetogo, ta ashi. Pai, züngsem ajak dang state terenlok aser inyakyimtem kecha tetsükdaktsü makai inyakyonga aotsü atema tali bendanga agütsüshir tashi tasen nung inyaktsü mepeshi.
Sentong nung NSSA tir Chubasangla Longkumer-i lokti pelaa agizükba mapang ashiba agi, Nagaland Civil Secretariat Service Association ya Nagaland nung mezüngbuba cadre service Association lir, koba 1960’s nung poktet aser 1970 küm November ita R. M. Dharr, Deputy Secretary, Planning Department lenisüba kübok amenok, kong asür N. L Murry mezüngbuba interim tir asütsü asoshi shim aser pa den ano interim executive züngsem teku shima liasü. Laisa, Association terenlok asoshi taoba mapang aser tang mapa nung alir shirnoki kümtem tsüngda bendanga agüja inyakogo, parnok ajak dang kanga pelaba lemsatep.
“Committed to Serve” omen nung ajemdaker association-i temaba jenjang nung inyaksangshia nüburtem tenzüktsü bangjem aser wara pokteter aliba mapang Association-i secretariat nung inyakyim balala ajanga nisung ajak indang khuret abener aser maneni kati ka taoba ta züngshitepa inyakyonga aotsü.
Hon Jubilee amungba anogo Longkumer-isa, NSSA nem Secretariat park anepalutsü atema temelaba agütsüba atema state sorkar dang pelaba lemsatep. Iba park ya secretariat nung inyakertem aser tesemdangertem atema anisüngzüka kazüba tesem ka asütsü, ta lai ashi. Maneni lai, park ajungkettsü atema teyari agütsür ajak dang pelaba lemsatepba den züngsem ajak dang pei mapa nung takok angutsü atema bendanga agüja inyaktsü ajungshi.
Kasa mapang nung alakteta jaokerisa Jubilee Souvenir aser NSS Blazer sayatsü. Maneni Advisor Urban Development & Municipal Affairs, Dr. Neikiesalie Kire-i, sentong nung NSSA indang kaket (Who’s Who Volume 1) ka sayatsü.
Jubileemung nung Association-i Hon Jubilee bangzüng agizüka ayu.
Sentong nung Kohima Baptist Pastors’ Fellowship, tir Dr. Kevichalie Metha-i temoatsü meshia sarasadem aser Zares Meripeni Ngullie NSS-i ken ka aten. Sentong tatemi Jubilee Planning Committee, mendenbuba P. Nungsangwapang-i tepela anküp o jembia liasü.