Nagaland SIR nung tim masüba lir: AICC Observer

Dimapur, October 30, 2026 (TYO): Nagaland nung electoral rolls indang Special Intensive Revision (SIR) nung tim masüba lir aser sensotem voting rights kümzüka ayutsü atema tenük yoktsüla ta All India Congress Committee (AICC) Observer Banna Gupta-i ashi.

BJP-i aniba Centre sorkari iba revision exercise ya political nükjidongtem atema inyaker. Congress-i democracy kümzüka ayutsü aser constitutional rights tenangzükba lir aser November 1 nü New Delhi nung aliba Red Fort nung lungkak aitba sentong tulu ka ayonga agitsü ta Gupta-i ashi.

“Nagaland nung vote enoktsür lakh 13.57 lir aser iba nungi voters aika tenüng agienogo. Electoral rolls meyipa reprangshiba ya aibelentem metongshitsü lir saka chichiba voters agientsüba masü” ta paisa ashi.

West Bengal nung voter tenüng aika mezüngbo agien saka ashishitepba sülen tanaben züluok. Rahul Gandhi-ia single address ka nung voters noklang aika tenüng züluoka aliba aser süogo ta shia agienba sülen taküm aliba tuteta sayuogo ta Gupta-i metetdaktsü.

Sorkarji koba political party-i yimsü südir süaka electoral rolls nung chichiba voters tenüng ayutsüla aser metemsürtem agientsüla ya paisa ashi.

Nagaland nung alirtemi timtem ajurura bangdakpur dangi aotsü mepishir. BLAs aser Booth Level Officers (BLOs) ajaki SIR maparen nung political agenda kecha nem-a manishidaktsütsüla ta Gupta-isa ashi.

“Dimapur aser Chümoukedima district tem nung SIR sülen Assembly constituency pungu nung voters 65,257 agienogo” ta Dimapur District Congress Committee (DCC) president Kutoho Chishi-i ashi.

Dimapur-I, II aser III nung revision masüdang voters ajak agi 1,25,703 liasü saka 89,074 dang kümogo. Iba ya voters 36,629 agienba lir. Ghaspani-I aser II nung voters 1,09,941 aliba 81,313 dang kümogo, iba ya voters 28,628 ajemba lir ta Chishi-isa ashi.

Voters aika agienba ya süoki ia bilemtsüba onük lir aser Nagaland nung alirtem dang chichiba voters magientsüsa inyaktsüla. Tanga state tem nung atalokba ama Nagaland nungbo matalokdaktsütsüla ta paisa shisem.

Election ketdangsürtemi anomaly list nung aliba chichiba voters ken o tem angadangtsüla aser corrections nung yariteptsüla. 2005 mapang yangluba records nung metokmeperitem alitsü akok saka iba ajanga voters tenüng magientsüla ta Chishi-isa metetdaktsü.

Paisa India sorkar aser Election Commission of India dang Nagaland nung alirtemi timtem ajurubatem asadangtsü aser documentary kulitem maliba atema tenüng magientsü mepishia metetdaktsüogo.