Nagaland sorkar akumba nung NPP-i tongti shilem agitsü: Asu

Kohima, Tsüklai 22 (TYO): Tanü National People’s Party (NPP)-i, Nagaland nung taruba sorkar akumba nung NPP-i tongtibang shilem agitsü, ta metetdaktsü.
Nagaland nung NPP ya yaküm Luchii (December) ita 2 anogo nung tenteta liasü aser taruba Nagaland Legislative Assembly election nung parnoki menden 25 nungi tokteptsü. NPP-i Naga People’s Front (NPF) den loktepogo.
Tanü Kohima nung osangbenertem senden ka nung jembidang taoba MLA aser 8-Western Angami Assembly Constituency nungi NPP candidate, Asu Keyho-i, “12buba NLA nung mepetmesü maneni adokba aser MLA temi nüburtem atema meinyakba ajanga nübur aser yimtenren lenirtem tsüngda tamang mekatepi akum,” ta metetdaktsü.
Nübur aser yimtenren lenirtem tsüngda tamang mekatepba ajanga tarutsü nung asenoki lendong ajurutsü, ta shia Asu-i, teimla tasen ka agutsütsü aser nüburtem tamang koktettsü atema pa dak mangdang lir, ta metetdaktsü.
“Tim terenlok agutsütsü aser asen nüburtem nem teimla tasen agutsütsü atema ni mangdang angur, kechiyong India sorkarji takar aser parnoki yaritsü melunga lir, ajisüaka ibaji yimtenren lenirtem dak dang keta lir, parnoki tim lenmangi anitsüla,” ta paisa ashi.
Pai ashiba agi, Centre nung NPP ya NDA teloktep nung dena lir, anungji nüburtem nem terenlok agütsütsü atema NPP maongka junga lir.
State nung gari lenmang densema tanga infrastructure majungba dak sendakba nung pai, “Tongtibangtibaji gari lenmang, tetsüng lenmang aser kilentzü aodak junga yanglutsütsü,” ta ashi.