Nagaland sorkar mapa inyakertemi Old Pension Scheme meshia lungkak ait

Kohima, February 16, 2024 (TYO): Nagaland sorkar mapang inyakertemi Hokolbarnü National Strike nung denogo aser parnoki New Pension System (NPS) agiener Old Pension Scheme (OPS) tenzüktsü takhangba agütsü.

2010 nungi Nagaland nung sorkar mapa inyakertem Civil Secretariat Kohima kima nung adenshi. Parnok ya Nagaland National Pension System Government Service Employees’ Forum (NNPSGSEF) kübok aden.

“All India State Government Employees Federation (AISGEF)-i “Scrap NPS. Restore OPS” takhangba agüja National Strike ayongzükba pusema nungita onoki Nagaland nung timi lungkak aitogo” ta NNPSGSEF president Moanungsang-i ashi.

2010 küm state sorkari NPS tenzükba sülen sorkar mapa inyaker 33,000 tema iba nung dena lir, ta pai ashi.

“OPS aser NPS tsüngda tepila tulu lir aser September 2023 nung NNPSGSEF-i state sorkar dangi shidi ka züluogo saka tanü tashi iba telangzüba kecha mali. January 1, 2010 sülen sorkar mapa nung shimokertemi sorkar tetuyuba ajanga NPS shimtsüsa aküm ta tanü National Strike ajanga jangjashitsür” ta Moanungsang-isa ashi.

“Iba ajanga sorkar mapa inyakertem taginüba matonger aser sorkari mapa nungi anisüngzük anguba sülen ang pension kecha magütsür” ta pai ashi.

NPS melena OPS aginür kechiyong OPS ya government beneficiary ka lir aser sorkar mapa inyaker nem pension agüja parnok tarutsü anogotem asoshi social security ka agütsür, ta paisa ashi.

“NPS yabo stock exchange/share market nung dang amendaka lir aser social security kecha magütsür. NPS ya corporate beneficiary ka lir aser sorkar mapa inyaker nem tajangzük kecha magütsür. NPS ya nija company ka lir aser state sorkari ita shia 50% aser mapa inyakeri 50% enoktsür” ta NNPSGSEF president-isa metetdaktsü.

“Nagaland nung Old Pension Scheme tanaben tenzüktsüla aser iba ajanga mapa nungi sodi angur ajaki pension/family pension angutsü” ta paisa ashi.

Onoki tarutsü anogotem nunga maneni takhangba agütsütsü aser Nagaland sorkari tanga state tem nung ama OPS tenzükshitsü teimla lir, ta Moanungsang-isa ashi.

Tanü anogo ana lungkak aitba mapang Confederation of All Nagaland State Services Employees’ Association (CANSSEA) aser Kohima, Dimapur, Niuland, Chumoukedima p Kiphire nungi NNPSGSEF units teshimtet nübotemi o jembi.

NNPSGSEF ya district pungu nung tenteta lir aser tanüngba district tem nunga tenzüktsü mapa inyakdar, ta Moanungsang-i ashi.