Nagaland sorkar nung mangatettep liaka MLA ajaki Tir election atema vote agütsü

CMO aser Assembly staff tsüngda mangatettep ka adok

Kohima, July 17 (TYO): Nagaland nung Naga People’s Front (NPF) lennirtem tsüngda tashi atsütepba mapang ka süaka, Hombarnü Assembly Secretariat nung MLA ajaki Presidential election nung vote agütsüogo.
Election Department aser Assembly Secretariat nati ketdangsüa agiba election nung MLA 59 pronglai vote agütsü aser parnokji NPF nungi 47, BJP nungi nungi aser Independent MLA 8 lir.
NPF sasep nung mepetmesü aliba ajanga tang teinyakdak Chief Minister Dr Shurhozelie Liezietsu pusemer MLA tem külemi arur ghonda ka tsüngda parnok indang vote agütsü. Iba sülen T R Zeliang pusemba MLA 43 prongla külemi arur vote agütsüba sülen nikongdang 1:00 meta parnok tanenzükdaki meyipa ao.
Tang Chief Minister teinyakdak Dr Shurhozelie Liezietsu ya Assembly nung MLA masü aser iba jagi pa vote agütsütsü temeten mali.
Tanü Dr Shurhozelie-i polling hall arudang security ketdangsertemi pa kishi nung nokdang aser idangji par sülen arurtem aser Assembly staff pur tsüngda mangatettep ka adok.
“Ni state nung tekolak ka asüba agi, polling hall nung security aser tanga maparen tiptema lir asü mali ta reprangdangi ao, saka ni polling hall süia aodang, Assembly nung staff kati ni marudaktsüi nokdang” ta Dr Shurhozelie-i osangbener dang ashi.
Idangji pa indang PRO-i ola adoka asaten aser polling booth kima nung mepetmesü ka adok, ta paisa shisem.
“Ni Assembly nung züngsem ka masü aser vote agütsütsü temeten mali ta ni meteta lir, saka yashi Assembly Secretariat dangi official shidi ka ajanga ni semdangtsü shioka liasü. Ajisüaka, tanü Assembly staff-i inyakba mapaji tesasatsüka lir,” ta Dr Shurhozelie-isa ashi.
“Assembly Secretariat-i sorkar den kecha masüngdangtepi, sorkar anema nokdakba MLA ka ang Election Agent inyaktsü shim aser iba atema sasa bilemtsür, kechiyong Assembly ji party maparen madak asütsüla” ta paisa metetdaktsü.
Tanü polling agiba mapang Dr Shurhozelie Liezietsu pusemer NPF Youth Wing züngsemtemi TR Zeliang pusemba MLA tem dang tejashi sayua tezülubatem amer Assembly gate nungi tatsüka pilar lenmang nung nokdak.